En Lituània se son meses en alèrta a causa de la politica exteriora expansionista del president de Russia, Vladimir Putin. En consequéncia, lo Ministèri de la defensa lituan a publicat e distrubuit trenta mila còpias d’un manual d’instruccions que dona de conselhs als ciutadans en cas d’invasion russa. Entitolat Guida de resisténcia activa, aquel manual arriba dins un contèxt de paur d'una possibla agression russa après que Donald Trump, que ven d’èsser elegit president dels Estats Units, a afirmat que vòl revisar lo ròtle de son país dins l’OTAN.

Segon The Guardian, aqueles manuals se publiquèron pel primièr còp en seguida de l’annexion de Crimèa a Russia en 2014, dins l’encastre de la guèrra d’Ucraïna. Alavetz, l’edicion metiá en relèu cossí agir en cas de situacions extrèmas o de guèrra e compreniá tanben d'instruccions de desobesissença civila en cas d’ocupacion.

La segonda edicion, tornada publicar a la fin de 2015, s'entitolava Preparacion per subreviure a d’urgéncias e de guèrras: un biais divertissent de comprene de recomandacions seriosas. Ara, dins la darrièra edicion que ven d’èsser publicada, se mençona clarament Russia e s’explica cossí reconéisser las armas de fabricacion russa, e tanben los tancs, las minas e d’autres espleches militars. En mai d’aquò, lo document sollicita dels ciutadans qu'espionen e assabenten sus l’enemic per evitar de tombar, tornarmai, jos l’ocupacion russa. La paur de la guèrra freja e de l’ocupacion sovietica demòra plan presenta en Lituània.