La dimenjada qu’arriba se jogarà la darrièra jornada de la fasa anar del Campionat d’Elèit 1. La competicion demòra dobèrta, mas los 4 gròsses costumièrs (los 3 Audencs e Sant-Estève-Catalans ) an fait lo trauc en cap del classament.
La Federacion ven d’anonciar que la finala se tendrià lo dissabte 3 de junh, probablament a Narbona, e beneficiariá de la retransmission per una cadena francesa de television.
Lo Dragonet assuca en fin de partida
Dissabte, Carcassona prenguèt lèu lo pas sus Avinhon dins una partida vodada a l’ofensiva. En signant 4 ensages dins lo primièr temps, los Canaris menavan 20-0 a la pausa. Aprèp une represa fòrta d’Avinhon que marcava dos còps per son centre Paul, los locals signavan quatre novèls ensages per l’emportar 42-16. En tèrra catalana, los locals avián de se faire perdonar la desfaita e la non-partida contra Sent Gaudenç. Los Sang e Aur menats a la pausa 10-6 per Limós aprèp un ensag de Borrèl (38a) impausavan lor lei als campions mercé a dos ensages marcats dins las 5 darrièras minutas (Perez a la 74a e Ambèrt a la 79a): 14-10.
Albi va ganhar a Tolosa 23-10; los tolosans an pas ganhat una partida dempuèi la debuta de la sason.
Dimenge, lo cap de fila Lesinhan ganha aisidament a Sent Gaudenç: 52-18 (amb 4 ensages per l’alièr Buche) e los catalans de Palau arrèstan l’espirala de la desfaita: victòria 20-14 fàcia a Vilanòva que menava 14-4 a la pausa!
Dissabte, per n’acabar amb las partidas anar, se jogaràn: Limós-Tolosa, Vilanòva-Carcassona e Albi-Palau; puèi, dimenge: Avinhon-Sent Gaudenç e, al Molin, una prometeira trucada entre Lesinhan e los Dragonets.
Los Elèit 2 dintran en Copa
Las formacions d’Elèit 1 dintraràn en Copa Lòrd-Derby pels 1/8n de finala que se jogaràn los 7 e 8 de genièr per dobrir l’annada 2017.
Aquesta dimenjada, se coneisserà los sièis adversaris d’Eleit 2 o, qui sap, de Nacionala 1 que prendràn part a aquel torn aprèp las partidas:
— tres entre formacions d’Elèit 2: Lion/Vilafranca; Carpentràs/Vilagalhenc-Argon, Ferrals-Entraigas,
— tres entre Nacionala 1 (que recebon) e Elèit 2: Pujòls-Montpelhièr, lo dèrbi catalan Barcarés-Baò, Salon-Lescura d’Albigés.
Avètz dit las Fèstas?
Profitatz plan d’aquesta dimenjada. Apuèi, serà lo temps que dison de las Fèstas, alara que seriá puslèu aquel de la Desolacion. Pensatz: tres setmanas de pausa tretzista!
Alan Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 Francesc, lo rugbí plan jogat, sustot lo de XIII (que's enebit de s'amodolar) son plan mens violents que d'autres espòrts de las nafraduras mai grèvas (coma lo fotbòl). Personalament aimi plan las doas règlas, XIII e XV, que fan véser de polidas causas.
Lo rugbi per desgràcia lo comprenem pas en aqueste estat ont m'ha tocat viure.Sembla interessant e un pauc bestia, mas aquí sabem pas las reglas del joc, e moltas causas las comprenen pas, nomai quan lo jugaire s'escapa amb la pilota e travesa la linia del fons. Mas puéi tiran uns llançaments coma se fossin penaltis ? E las tuch es qu'es pas aissit de comprene. E nos sembla trop violent, que cresi que los paures deuen acabar plens de cops per tot. Mas a causas polidas quan corren e diblan a los contraris.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari