La designacion del director executiu d’Exxon Mobil, Rex Tillerson, coma nòu secretari d’Estat confirma l’idèa que la politica del govèrn del president elegit dels Estats Units, Donald Trump, serà de compromés. Un cambiament dont benefícia Russia.

Lo 19 de decembre que ven, lo Collègi Electoral dels Estats Units confirmarà Trump coma lo president seguent, mas sembla cada còp mai evident que lo grand ganhant de la campanha de 2016 es lo president de Russia, Vladimir Putin.

Que siá intervengut o pas per favorir Trump —la CIA pensa que òc, mas l’FBI n'es pas tan segur— es un escàndol relatiu, compte tengut que los Estats Units long de lor istòria son intervenguts o an ensajat d’intervenir pendent los procèsses electorals e politics a travèrs de tot lo Mond, e pas totjorn pacificament. La difusion interessada dels corrièrs del Comitat Nacional Democrata, que foguèron divulgats pendent la campanha per Wikileaks, provoquèron de problèmas sul terren de la candidata democrata Hillary Clinton.

Lo president Barack Obama donèt d’òrdres als servicis d’intelligéncia per avalorar çò que s’èra passat, los primièrs rapòrts dison que Russia èra darrièr çò que s’èra passat e que, volguda o pas, l’interferéncia s'es mostrada favorabla a l’eleccion de Trump, qu’a reagit d’una manièra sceptica e determinanta. “Aquelas son las meteissas personas que diguèron que (lo president d’Iraq d'alara) Saddam Husayn aviá d’armas de destruccion massissa”, declaracion qu’aumenta las perspectivas d’una relacion antagonica amb los caps dels servicis secrets estatsunidencs.

Lo nòu Secretari d’Estat Tillerson

Dins lo periòde de passacion de poder d’un president a l’autre, Trump a mostrat pauc interès als rapòrts de l’intelligéncia. Pendent la campanha electorala, a manifestat sa fisança qu’el poiriá trabalhar amb Putin per reparar la fractura entre Russia e los Estats Units.

Aquela intencion es estada ratificada amb la nòva que Tillerson es son Secretari d’Estat. La nominacion de Tillerson —que, coma Trump, a pas d’experiéncia de govèrn anteriora— es solament l’exemple pus recent de la pauc ortodòxa e inesperada ascension del president elegit a l’Ostal Blanc.

El prometèt de melhors acòrdis e considèra la politica exteriora coma un mejan per los aténher.

L’experiéncia de Tillerson davant una de las corporacions multinacionalas màgers del Mond es cèrtament considerabla per son trabalh coma cap de la diplomacia.

I a pas cap de dobte qu’el coneis los jogaires clau dins los principals païses productors d’energia de l’Orient Mejan, l’Asia Centrala e Africa. E coneis Putin, que li concediguèt una reconeissença de l’Òrdre de l’Amistat, après la conclusion d’un acòrdi d’exploracion en 2013.

Sas opinions sus Russia, Putin e las sancions seràn sens cap de dobte subjècte de discussion pendent las sessions de sa confirmacion al Senat. Las sancions internacionalas an menat a l’esfondrament las iniciativas d’Exxon Mobil en Russia, après la crisi d’Ucraïna en 2014 e l’annexion de Crimèa.

La crisi en Siria

Se Trump a l’esperança de pervenir a una relacion mai pragmatica amb Putin, quals son los acòrdis vertadièrament possibles e profechoses, entre los Estats Units e Russia?

Trump sembla que cèrca de cambiar la posicion de Washington sul tèma de Siria.

Puslèu que cercar la desaparicion de Bashshar Al Asad coma resultat final d’una negociacion politica —una tòca de mai en mai impossibla d’aténher compte tengut de l’intervencion de Russia—lo govèrn de Trump se poiriá orientar a cort tèrme a estabilizar los airals especifics contrarotlats pel govèrn e pels curds.

Una solucion pus larga demorariá diferida fins que l’autonomenat Estat Islamic —e son cosin d’Al-Qaida Jabhat Fateh Al-Sham— sián definitivament vencuts.

De sancions contra Russia

Quin desgèl que siá de las relacions entre los Estats Units e Russia aumentarà lo vam devèrs l'aflaquiment de las sancions impausadas en consequéncia de la crisi en Ucraïna de 2014.

E mai se son aumentats los còstes per Putin, las sancions an pas menat a la restitucion de Crimèa a Ucraïna.

Lo govèrn de Trump poiriá considerar d’aleugerir qualques unas de las sancions en contrapartida d’un estricte compliment del nomenat procès de patz de Minsk e de la fin de l’ingeréncia russa dins l’èst d’Ucraïna. Crimèa tornariá venir un tèma bilateral entre Russia e Ucraïna.

Acòrdi nuclear

Òm poiriá interpretar aqueles passes coma de victòrias de Putin. Que ganharián amb aquel acòrdi los Estats Units? En contrapartida de fer tornar Putin del freg, lo govèrn de Trump obtendriá l’acòrdi de Russia per tornar prene las negociacions sus las armas estrategicas destinadas a reduire lors respectius arsenals nuclears e l’esclariment de lors respectius plans de modernizacion nucleara.

Un tractat sus las armas nuclearas es un trionf fòrça grand per quin president que siá. Ronald Reagan o faguèt. Son d’acòrdis que son vistes d’un biais favorable pels electors estatsunidencs e lo compliment pòt èsser verificat. I arribar exigirà de Trump de daissar de costat lo qu’es vist coma son potencial sossecretari d’Estat: John Bolton, un arderós defensor d'un poder estatsunidenc dur. Mas aquò es çò qu’implica d'èsser president e encara sabèm pas res d’aquela nòva administracion dels Estats Units.

Aquesta nòva es adaptada de Geopolítica.cat amb qui Jornalet ten un acòrdi de cooperacion.