L’Assemblada francesa a tornat aprovar de prorogar l’estat d’emergéncia fins al 15 de julhet de 2017. La prorogacion l’aprovèron los deputats dins la nuèch de dimars a dimècres per 288 vòtes contra 32, e la tòca es que siá en vigor durant l’eleccion presidenciala, prevista lo 23 d’abril e lo 7 de mai, e tanben pendent las legislativas que se tendràn l’11 e lo 18 de junh.
 

Lo tèxt qu’an aprovat los deputats lo presentèt l’actual primièr ministre, Bernard Cazeneuve, e lo ministre de l’Interior, Bruno Le Roux, e foguèt refusat solament pels elegits del Front d’Esquèrra e los ecologistas, que jutjan la mesura “ineficaça” e “perilhosa” pels dreches fondamentals.

L’estat d’emergéncia foguèt decretat après los atemptats del 13 de novembre a París e dona al govèrn e a l’estat francés de poders excepcionals que son estats fòrça criticats. Durant son aplicacion, los partits d’esquèrra e las associacions que defendon los dreches umans son inquietas qu’aquela disposicion repressiva se perpetue long del temps.
 
 
Supression de la Convencion Europèa dels Dreches Umans
 
Tant que durarà l’estat d’emergéncia, l’estat francés decidiguèt de suspendre son adesion a la Convencion Europèa per la Proteccion dels Dreches Umans e de las Libertats Fondamentalas. O faguèt en tot mandar una comunicacion oficiala al secretari general del Conselh d’Euròpa, Thorbjørn Jagland, coma o raportèt Geopolítica.cat e coma o confirmèt Le Monde.