Una còla internacionala d’arqueològs coordenada per l'universitat de Göteborg explòra las rèstas d’una vila anciana al centre de Grècia. Concretament près del vilatge de Vlokhós a 300 quilomètres al nòrd d’Atenas. Segon los expèrts, las roïnas an aperaquí 2500 ans d’antiquitat, e mai se i a de vestigis de divèrses periòdes istorics. La vila se tròba sus un puèg d’ont se vei la granda plana de Tessàlia.

 

Lo cercaire e cap dels trabalhs, Robin Rönnlund, a assegurat que qualques rèstas se coneissián mas èran consideradas coma pauc importantas. Pasmens, las nòvas descobèrtas, dont una plaça e lo quadrilhatge d’una carrièra, an permés a la còla de certificar que s'agís d’una granda vila. “L’airal d’exploracion se tròba dins una muralha e sas dimensions son de mai de quaranta ectaras”, çò afirma Rönnlund.

 

La còla escarta pas de far mai de descobèrtas sus aquel puèg pr’amor qu’an trobat los vestigis de tors, de parets e de pòrtas de la vila. E mai se la part pus granda de las roïnas se tròban enterradas, los arqueològs vòlon pas cavar mas emplegar d’autras tecnicas de deteccion coma l’usatge d’un radar aerian. Aital desiran evitar de possibles damatges.

 

“Se sap pas grand causa sus las vilas ancianas d’aquela region. Fòrça cercaires cresián que l’oèst de Tessàlia èra un endrech isolat e sosdesvolopat. Nòstre projècte servís a emplir aquel void de coneissença sus la region”, çò conclutz Rönnlund.