Lo president dels Estats Units, Barack Obama, refusèt dijòus passat de signar una lei aprovada pel Congrès dels Estats Units per manténer las sancions contra Iran encara dètz ans de mai. Aquela decision evitarà pas que la lei intre en vigor, mas si qu’es una mòstra clara de son refús.

La constitucion estatsunidenca establís que quand una lei es aprovada pel Congrès —qu'ara meteis es dominat pel Partit Republican— lo president a dètz jorns per la signar, la vetar o far pas res. En cas que lo president ratifique pas la lei quand lo Congrès es pas en periòde de sessions, se considèra qu'a exercit un vèto de facto sens blocar oficialament lo tèxt e se'n deu tornar començar la procedura .

En d'autras escasenças, lo fach de signar pas significa l’equivalent d'una abstencion: la lei seguís son cors, mas sens l’aprobacion del president. “Aquesta administracion a mes en evidéncia qu'una extension de la Lei de Sancions contra Iran, e mai s’es superflua, es totalament coerenta amb nòstres engatjments amb lo Plan d’Accion Global e Comun. Per ansin l'extension de la Lei de Sancions contra Iran intrarà en vigor sens la signatura del president”, çò manifestèt l'Ostal Blanc dijòus dins un comunicat.

Lo Plan d’Accion Global e Comun es un acòrdi nuclear entre Iran e los païses membres del Conselh de Seguretat de las Nacions Unidas, ont Iran acceptèt de restrénher lo desvolopament de son programa atomic en contrapartida d'una levada graduala de las sancions introduchas.

Iran prometèt de respondre amb duretat en cas que s’aprovèsse un espandiment de las sancions de part dels Estats Units perque considèra que supausariá una violacion dels tèrmes de l’acòrdi nuclear. Dimars passat, lo president iranian ordenèt de metre en marcha los plans per bastir de vaissèls de propulsion nucleara e acusèt los Estats Units de complir pas lo pache sus son programa atomic.

Lo mantenement de las sancions poiriá provocar de tensions dins las relacions entre Teheran e Washington, que, tre que se produguèt la victòria de Donald Trump, an patit un refregiment. Lo president elegit a promés fòrça còps que refusariá l’acòrdi nuclear amb Iran tre que seriá intrat en foncion.