Se tenguèt ièr a Marselha una accion per revendicar la preséncia de l’occitan al MUCÈM, lo Musèu de las Civilizacions d’Euròpa e de la Mediterranèa. Las parets de veire del musèu presentan en sèt lengas l’article catòrze de la Declaracion Universala dels Dreches Umans. La lenga del país i es pas. Per aquela rason, una còla de militants occitanistas, quilhats estoïcament, i despleguèron de 12h a 16h una bandeiròla de dos mètres que pòrta lo tèxt en occitan que manca. “Còntra lei persecucions cadun a drech de cercar asil e de beneficiar de l’asil dins d’autrei país”, çò ditz l’article en question, segon la bandeiròla que tenguèron.
 
L’accion seguissiá una iniciativa de Danís Capian, que i anèt “coma uman occitanofòn que vòu qu’en Occitània los dreits umans siavon afortits en occitan”. L’acompanhavan son amic Mickaël Neyrolles, qualques militants d’Iniciativa per Occitània e una representacion de l’Ostau dau País Marselhés.
 
 
De reaccions positivas
 
Mentretant se repartissiá de tractes al mond que passejavan en explicant l’accion, e la majoritat mostrèron lor simpatia. “Totes comprenián lo ligam entre la defensa de l’occitan e lo drech a l’asil, lo respècte de la diversitat...”, çò diguèt a JornaletMatiàs Gibèrt, qu’èra sus plaça. “De passantas que son vengudas parlar amb nosautres, en occitan. Sovent de femnas, fòrça femnas e d'estrangièrs totjorn positius e interessats de comprene, lo ligam entre la lenga occitana e la catalana, los escambis culturals, etc”. De son costat, Gerard Joan Barceló, confirmava a la redaccion las paraulas de Gibèrt “en ajustant que d'unes èran prèstes a signar una peticion o a escriure al MUCÈM”.
 
“Doas femnas que parlan provençal e un òme que parla lengadocian comuniquèron amb nosautres. L'occitan se pòt parlar encara amb de desconeguts al còr de Marselha en 2016!”, çò manifestèt Domergue Sumien.
 
L’anecdòta de la jornada la portèt una femna argeriana installada a Marselha dempuèi un an que s'estonèt que los marselheses s'interessèsson pas a lor lenga e lor cultura e quitament deplorèt que lo monde parlèsson pas pus amb l'accent.
 
 
Un musèu qu’ignòra la lenga e la cultura del país
 
Lo MUCÈM s’inaugurèt lo 7 de junh de 2013 a Marselha dins l’encastre de las activitats de la Ciutat Focèa coma Capitala Europèa de la cultura. Bastit sus de tèrras ganhadas sus la mar, lo sit cèrca d’èsser un espaci màger d’analisi e interaccion de las divèrsas civilizacions de Mediterranèa long de l’istòria, mas ont la lenga e la cultura del país  son pas brica presentas. De fach, lo musèu a fach d’esfòrces extraordinaris per ignorar las nombrosas mòstras d’indignacion a prepaus de l’abséncia de la lenga e la cultura del país.
 
 
 
 

---

Editorial: Sant Sebastian, Marselha, lo MUCÈM e los eròis del país

 

mmmmm		mmmmm
	En seguida de l'accion menada per Danís Capian davant lo MUCÈM de Marselha per i revendicar l’occitan, Iniciativa per Occitània a mandat una letra al president del musèu e prepausa qu’òm se n’inspire per li escriure tanben.