La persona qu’es ara arrestada per l’atemptat de Berlin, poiriá èsser innocenta. La polícia alemanda dobta ara que lo detengut siá l’autor de l’ataca, e cranh que lo criminal siá totjorn liure e armat. Lo ministre de l’Interior alemand, Thomas De Maizière, a explicat als mèdias que lo suspècte detengut refusa l’acusacion, figura pas dins las basas de donadas dels possibles terroristas, e foguèt arrestat a 1,5 Km del luòc del crime.
 
Lo detengut es un òme paquistanés qu’arribèt en Alemanha lo 31 de decembre de 2015 qu’aviá sollicitat l’asil, mas que sa demanda aviá patit qualques complicacions “a causa de dificultats lingüisticas” qu’aurián pas pogut esclarzir sa situacion a las autoritats, segon De Mazière.
 
L’atemptat se passèt diluns de ser, quand un camion se roncèt sus la molonada que se trobava dins lo mercat de Nadal mai frequentat de Berlin en tuant 12 personas, e en nafrant 50 autras. Demest lo dotzenat de victimas i a lo qu’èra lo menaire del camion, que foguèt tuat amb un pistolet per l’assalhidor, segon lo ministre. L’arma l’an pas trobada. Aquel atemptat terrorista poiriá èsser inspirat del masèl que lo patiguèt Niça lo 14 de julhet passat.