Lo Conselh de Seguretat de las Nacions Unidas aprovèt divendres passat una resolucion que cèrca de metre fin a las installacions israelianas sul territòri palestinian. Lo tèxt foguèt aprovat gràcias a l’abstencion dels Estats Units, qu'abandona aital son tradicional vèto a totas las questions que tòcan l’estat d’Israèl. Los autres 14 membres i votèron en favor.
 
Lo borrolhon foguèt redigit per Egipte amb l’ajuda de las autoritats palestinianas, e foguèt aculhit amb una ovacion pels membres del Conselh de Seguretat: es la primièra resolucion sul conflicte entre l’estat d’Israèl e Palestina que s’apròva dins los darrièrs uèch ans.
 
Lo tèxt declara que las installacions de colons d’Israèl, que definís coma “poténcia ocupanta”, es una violacion flagranta del drech internacional e ne demanda la cessacion immediata de las activitats de bastison e espandiment. Tanben soslinha qu’internacionament se reconeisserà pas cap de cambiament de las frontièras establidas en l’an 1967 que siá pas fruch de las negociacions entre las partidas. Dins aquel sens, fa una crida a reprene las convèrsas de patz entre las doas partidas.
 
Lo Conselh de Seguretat sollicita tanben dels dos camps que quiten de far “de provocacions” que pòscan frustrar lo procès de patz e demanda que se compliscan las obligacions qu'establís lo drech umanitari, mai que mai tocant la populacion civila.