Dimenge passat, en plen jorn de Nadal, l’estat d’Israèl cridèt los ambaissadors dels estats membres del Conselh de Seguretat de Nacions Unidas qu’avián votat contra las installacions israelianas en Palestina divendres passat. La resolucion 2334 foguèt aprovada amb los vòtes favorables de totes los membres del Conselh de Seguretat, amb la novetat que los Estats Units exerciguèron pas lo tradicional drech de vèto, qu’aplican sistematicament en favor d’Israèl. L’administracion Obama decidiguèt que son ambaissador s’abstenguèsse davant una proposicion presentada al començament per Egipte mas que foguèt fin finala prepausada per Veneçuèla, Malàisia, Senegal e la Nòva Zelanda.
 
En seguida d’aquò, Israèl a retirat sos ambaissadors e a gelat las relacions diplomaticas amb Senegal e la Nòva Zelanda, car los acusa d’inspirar la resolucion, a gelat las relacions amb l’autoritat palestina e a retirat sa contribucion financièra de cinc institucions de l’ÒNU.
 
Los autres dos estats promotors de la resolucion e membres de l’actual Conselh de Seguretat de las Nacions Unidas, Veneçuèla e Malàisia, an pas relacions diplomaticas amb Israèl. E totes los autres, franc dels Estats Units, son estats cridats pel Ministèri dels Afars Estrangièrs que los a menaçats de prene de mesuras. I son anats los ambaissadors de Russia, China, França, lo Reialme Unit, Japon, Ucraïna, Egipte, Angòla e Uruguai. Los Estats Units son pas estats cridats a consultas.
 
La resolucion aprovada es pas coercitiva mas podriá crear un grèu problèma a Israèl se l’autoritat palestiniana decidiguèsse de l’emplegar davant la Cort Penala Internacionala.