Portugal visquèt dissabte passat la mai granda mobilizacion per carrièras de la siá istòria democratica. De centenats de milièrs de personas participèron a de concentracions e manifestacions contra la troika comunautària, fachas simultanèament dins quaranta vilas.

Lisbona, O Porto, Braga, Coïmbra, Aveiro, Ponta Delgada, Viana do Castelo, Funchal e Beja foguèron qualques unas de las vilas que visquèron las manifestacions mai grandas jol lèma “Que se lixe a troika, queremos as nossas vidas!” [A cagar la troika, volèm las nòstras vidas]. Dins totas las manifestacions, i aviá tot plen de bandièras portuguesas e tornèt sonar lo vièlh eslogan de la Revolucion dels Garòfles: “O povo unido jamais será vencido” [Lo pòble unit jamai sera vencut].
 
Dins las manifestacions i aguèt plan pauc d’incidents. Los mai importants se passèron a Lisbona davant lo parlament, quand qualques grops de manifestants lancèron de pèiras e d’objèctes contra la bastissa.