Se ven de confirmar que foguèt un “factor uman”que provoquèt l’accident de l’avion que s’escrachèt a la fin de novembre en Colómbia, ont moriguèron 71 personas, la majoritat del club de fotbòl Chapecoense. L’aparelh volava amb pauc de combustible e amb excès de pes, segon çò que se ven de publicar dins un rapòrt preliminar de l’agéncia colombiana d’aviacion civila. Lo secretari de l’organisme expliquèt diluns que los enregistraments de la gabina demostravan que lo pilòt e lo copilòt discutissián sus la possibilitat de far escala a Leticia o a Bogotà pr’amor que se trobavan al limit del combustible.
 
“Èran conscients que lo combustible qu'avián èra pas l’adeqüat ni mai lo sufisent, e que lo pes èra superior al permés dins los manuals”, çò ditz lo comunicat.
 
La contrarotlaira de l’aeropòrt de Rionegro a Medellín, que recebèt l’apèl d’urgéncia, Janeth Molina, a revelat que l’accident seriá encara pogut èsser pus grèu, pr’amor qu'èra fòrça près d’autres avions.
 
En mai d’aquò, l’aparelh teniá un certificat per volar a un maxim de 28 000 pès d’altitud mas depassèt aquel limit fins als 30 000.