L’actritz Carrie Fisher, coneguda per son ròtle coma princessa Leia dins Star Wars, moriguèt ièr a causa d’una crisi cardiaca qu’aviá patida divendres dins un avion mentre qu’anava de Londres a Los Angeles. Après una intervencion d’urgéncia dins lo quite avion, Fisher foguèt lèu menada dins un espital de Los Angeles. Segon las darrièras informacions, son estat de santat s’èra estabilizat, mas fin finala, a 8h55 del matin d’aqueste dimars 27 de decembre, es defuntada.
 
Fisher venguèt tot d’una celèbra en 1977, quand George Lucas li autregèt lo ròtle de la princessa Leia per La guèrra de las estelas (1977), al costat d’Harrison Ford. Aquel ròtle lo tornèt jogar dins los filmes seguents de la meteissa saga Star Wars, coma L’Empèri contrataca (1980) e Lo retorn del Jedi (1983). Tornèt prene lo personatge dins l’Episòdi VII, La Fòrça se revelha, que se projectèt en 2015.
 
La fama la menèt a de tempses sorns, degalhats pels excèsses de las drògas e de l’alcòl, e, a causa d’aquelas dependéncias, apareguèt pas sovent al grand ecran. Tornèt totun aver un ròtle màger dins lo filme de Woody Allen Hannah e sas sòrres de 1986.