De milièrs de personas empliguèron dissabte passat la plaça Colón de Madrid, dins una massissa protèsta contra las reduccions budgetàrias del govèrn de Mariano Rajoy, jol lèma “Anem! Vòlon arroïnar lo país, o nos cal empedir”. Quatre colomnas de manifestants venent de divèrses ponches de l’estat e sièis agropaments de trabalhadors de la foncion publica, l’educacion, la santat e los servicis socials partiguèron amb de camisetas de las colors correspondentas als lors collectius e amb de bandieròlas e de bandièras.

“Eurovioléncia non!”, “Mòrt al marrit govèrn”, “Òc per la reactivacion de las comarcas menièras”, “Per una Euròpa mai sociala e amb d’emplec” foguèron qualques unas de las bandieròlas que s’i podián legir.
 
Dins l’acte final intervenguèron los secretaris generals dels principals sindicats de l’estat: per las CCOO, Ignacio Fernández Toxo, e per l’UGT, Cándido Méndez. Parlèron tanben lo president del sindicat de foncionaris CSI-F, Miguel Borra, lo secretari d’USI, Julios Salazar, lo president del Conselh de la Joventut d’Espanha, Ricardo Ibarra, e la presidenta del Conselh General del Trabalh Social, Ana Lima, e d’autres.
 
Toxo e Méndez exigisson que Mariano Rajoy someta la siá politica economica a referendum e asseguran qu’es el qu’a la clau d’una nòva cauma generala. Per Toxo e Méndez, lo president del govèrn espanhòl a “l’obligacion morala e democratica de demandar al pòble”.
 
La polícia espanhòla arrestèt quatre manifestants qu’avián desplegat una bandieròla cridant a entornejar lo Congrès dels Deputats espanhòl lo 25 de setembre venent (vidèo). La polícia los acusa de resisténcia e desobesiment. La Coordinacion del 25 de setembre situa las arrestacions “dins l’estrategia de criminalizacion del Ministèri de l’Interior d’aquestas darrièras setmanas”. A la meteissa ora, a Madrid, i aviá tanben de membres de l’extrèma drecha amb de bandièras franquistas e nazis que participèron a una manifestacion sens cap de problèma.
 
La polícia liberèt los quatre arrestats dissabte de ser, après los interrogar.