Lo Bascoat del Nòrd [e lo Bas Ador e Gramont] ten dempuèi dimenge, lo 1r de genièr, la primièra institucion administrativa pròpria de son istòria: l’Establiment Public de Cooperacion Intercomunala, o l’ÈPCI del Bascoat (o Euskal Herriko Hirigune Elkargokoa). Es lo primièr còp que los bascos de l’estat francés an una institucion pròpria que los amassa e lor concedís una cèrta existéncia legala.

Lo territòri compren 158 comunas. La majoritat son bascofònas, levat de qualques unas occitanofònas de l’encontrada del Bas Ador e uèch comunas sus onze de Gramont, e doncas qualques sectors occitanistas demandan que lo nom de l’ÈPCI prenga en consideracion aquel caractèr a l’encòp basco e occitan. En mai d’aquò, las comunas bascofònas de Gestars e Esquiula son exclusas car an pas volgut jónher l’ÈPCI. Al total son cent cinquanta uèch comunas qu'ocupan près de tres mila quilomètres cairats e an una populacion de tres cent mila abitants.

Un ÈPCI es un tipe d’estructura administrativa francesa qu’amassa de municipalitats e met en comun de competéncias municipalas. Lo nòu ÈPCI basca fusionarà a partir de genièr las dètz comunautats de comunas qu’existisson a l’ora d’ara en Bascoat Nòrd, Bas Ador e Gramont. Demièg sas competéncias i a lo desvolopament economic, las politicas urbanas, las gestions de las bordilhas e de l’aiga. La lei francesa permet als ÈPCI d’aspirar a gerir de competéncias suplementàrias, dont de culturalas, d’environamentalas, de lingüisticas e de ligadas a la cooperacion transfrontalièra.

La constitucion d’aquela entitat basca dins l’estat francés es seguida amb un interés especial en Catalonha Nòrd, a causa del fòrt movement de refús del nom de la nòva region qu’a pres lo nom d’Occitània sens mençonar l’inclusion del país catalan.