A partir de 2017 se poirà pas pus batre los enfants en Occitània. Los castigs corporals èran ja enebits dins los estats espanhòl e italian, e ara, fin finala, la lei francesa los enebís tanben, segon çò que rapòrta Libération. A la fin de 2016, lo Parlament francés aprovèt una nòva version de l’article 371-1 del còde civil que protegís l’enfant “dins sa seguretat, sa santat e sa moralitat, per assegurar son educacion e permetre son desvolopament, dins lo respècte degut a sa persona e a l’exclusion de tot tractament crusèl, degradant e umiliant, i comprés tot recors a las violéncias corporalas”.
 
En març de 2015, lo Conselh d’Euròpa avertiguèt l’estat francés per aver violat lo tractat qu’enebís los castigs corporals als enfants e los aver pas interdiches clarament, contràriament a la majoritat dels autres estats de l’Union.  Ara es ja fach, e mai se la mesura aprovada es unicament civila e i a pas cap d’accion penala prevista a l’encontre dels parents.
 
Sus 47 estats que son sòcis del Conselh d’Euròpa, una majoritat de 27 an de leis contra los castigs fisics dels enfants dins l’encastre familial.
 
Mentre que lo castig corporal es totjorn acceptat dins l’87% de la planeta, èra ja enebit dins los estats d’Alemanha, Àustria, Bulgaria, Chipre, Còsta Rica, Croàcia, Danemarc, Espanha, Finlàndia, Grècia, Islàndia, Israèl, Itàlia, Letònia, Norvègia, la Nòva Zelanda, Ongria, los Païses Basses, Portugal, Romania, Suècia, Ucraïna, Uruguai e Veneçuèla.