Lo país mai paure de l’Union Europèa, Bulgaria, a renonciat d’intrar dins l’èuro davant l’actuala crisi economica e financièra, e mai s’a complit totes los critèris tecnics. Lo govèrn ditz que tròba pas cap d’avantatge de jónher l’èuro e, al contrari, que i vei solament de còstes e qu’es tròp riscat. L’actuala moneda de Bulgaria es lo lev.

Bulgaria redusiguèt arunan lo deficit budgetari fins a 2,1% del PIB, a travèrs d’una diminucion de las pensions e dels salaris del sector public. Ara la moneda bulgara es una moneda fòrta. Lo ministre de las finanças, Simeon Djankov, disiá fa qualques jorns, al Wall Street Journal, qu’èra tròp riscat d’intrar dins la Zòna Èuro perque las nòrmas èran pas ges claras e, tanpauc, sabiá pas çò que se passariá dins un an o dos. Lo primièr ministre, Bojko Borisov, a confirmat a Sòfia que la decision del govèrn bulgar d’intrar dins l’èuro “es demorada congelada de faiçon indefinida”.
 
Bulgaria aviá previst d’intrar dins l’èuro lo 1r de genièr de 2013, segon un acòrdi obtengut en 2010, mas dempuèi de meses, ja èra evident qu’aquò se passariá pas. Ça que la, las monedas amb lo revèrs estatal èran ja estadas preparadas. I aviá agut, en fach, una importanta discussion pr’amor qu’anava èsser lo primièr país a emplegar l’alfabet cirillic sus la moneda unica e, doncas, auriá calgut apondre una autra linha per escriure lo mot “èuro”, qu’en los bilhets actuals apareis en los alfabets latin e grèc.
 
Letònia e Lituània son pas tanpauc clars per intrar dins l’èuro, preferisson esperar e veire cossí evolucionarà la situacion economica.