Sant Nari (Tolonenc) es una vilòta provençala de mai en mai coneguda per sas afichas publicitàrias, qu'an fach objècte de discussion. Ara, una d’aquelas afichas critica la dobla mesura de la justícia francesa a respècte de Christine Lagarde e de Jacqueline Sauvage, çò rapòrta La Rade TV.

“Lei magistrats protèstan còntra la liberacion de Catherine Sauvage. Leis avetz ausits per Christine Lagarde?”, çò se demanda lo panèl publicitari, que conten una error de prenom per rapòrt a Jacqueline Sauvage.

Jacqueline Sauvage foguèt jutjada per aver tuat son marit, Norbert Marot, de tres còps de fusilh dins l’esquina lo 10 de setembre de 2012. Durant lo procès, la defensa se basa sus l’afirmacion de violéncias e abuses sexuals patits per l’acusada e per sas filhas durant plusors decennis. L’incompreneson generala per sa condemnacion provoquèt una mediatizacion de l’afar e de debats sus l’aplicacion de la legitima defensa en cas de violéncias conjugalas.

Lo 31 de genièr de 2016, lo president francés François Hollande acordèt a la condemnada una gràcia presidenciala parciala, mas la justícia refusèt sa demanda de liberacion condicionala. Fa qualques jorns, lo 28 de decembre passat, Hollande concediguèt a Dòna Sauvage una gràcia presidenciala totala.

De son costat, Christine Lagarde, directritz de l’FMI, autregèt una indemnizacion de 403 milions d’èuros a Bernard Tapie, un òme d’afars francés e èx-patron de l’OM, quand ela èra ministra de l’economia e de las finanças del govèrn de Fillon jos Sarkozy. La Cort de Justícia de la Republica Francesa l’a reconeguda colpabla de “negligéncia” e “malversacion de fonzes publics”, mas li a pas impausat cap de pena.