Detenguèron en Grècia, lo 27 de decembre passat, los activistas bascos Mikel Zuloaga e Begoña Huarte quand ensajavan de menar uèch personas refugiadas devèrs lo Bascoat, çò rapòrta Directa.

Zuloaga e Huarte fan partida del collectiu Ongi etorri errefuxiatuak (Benvenguda als refugiats) qu’aviá lançat una iniciativa de solidaritat e de denóncia contra las “politicas migratòrias injustàs europèas e en defensa dels dreches umans”. O faguèron dins l’encastre d’una accion de desobesissença civila cridada per divèrses collectius socials sensibles a la tragèdia dels refugiats. Lo camping-car amb lo qual menavan los refugiats en question foguèt interceptat sul pòrt de Igoumenitsa (Grècia) abans passar dins lo vaissèl que los deviá menar en Itàlia.

Segon Ongi etorri errefuxiatuak, “es probable que las personas refugiadas sián mesas en libertat, car eles an pas comés cap de delicte”. La revista Pikara o confirma. Pasmens, Zuloaga e Huarte son arrrestats e riscan una acusacion de trafec d’èssers umans, un delicte punit en Grècia amb de penas de preson plan nautas.

Una peticion en linha s’es bandida sus Change.org per sosténer los detenguts. Los signataris asseguran que los activistas bascos “trafegavan pas amb d’èssers umans, mas per mejan d’una iniciativa de desobesissença a las leis migratòrias europèas, cercavan de desvolopar una accion de solidaritat e de denóncia publica”.