Un total de 6788 civils son mòrts en l’an 2016 en Iraq a causa d’atemptats terroristas e del conflicte armat contra l’autoproclamat Estat Islamic qu’ocupa lo nòrd del país, segon de donadas publicadas per la Mission d’Assisténcia de las Nacions Unidas (UNAMI).

Dins lo sol mes de decembre passat, l’UNAMI enregistrèt la mòrt de 385 civils en Iraq. La region de Niniva, ont se se situa Mossol, es l’endrech pus afectat per la violéncia, amb mai de 200 victimas mortalas e 511 ferits.

Tanben la vila de Bagdad s’es vista mai que mai secoduda per las atacas terroristas, qu'an causat la mòrt de 109 personas dins lo darrièr mes de 2016. Lo pichon governorat de Kirkuk, al nòrd del país, a patit un total de 64 victimas mortalas en decembre .

“E mai se las chifras de decembre son inferioras a las dels meses precedents, avèm enregistrat un aument de las atacas terroristas dins las darrièras setmanas, qu'avián coma tòca de civils”, çò soslinhèt Ján Kubis, representant del Secretariat General de l’ÒNU en Iraq.

Diluns passat, una tièra d’atemptats terroristas tuèt almens 60 personas e ne feriguèt qualques desenats en divèrses endreches d’Iraq. L’ataca mai grèva foguèt contra un mercat al centre vila de Sadr, e tuèt 39 personas.

Fin finala, segon las donadas de l’UNAMI, 12 388 personas son estadas grèvament nafradas en Iraq al cors de 2016. Totun, la mission de l’ÒNU a pas pogut obténer de donadas dins la província d’Al Anbar, la region pus vasta d’Iraq.

“I a pas cap de dobte que l’Estat Islamic ensaja de desviar l’atencion de sas pèrdas a Mossol, e malaürosament son de civils innocents que pagan aquel prètz”, çò apondèt Kubis.

L’ofensiva per reconquistar Mossol, lo principal bastion dels jihadistas en Iraq, comencèt lo 17 d’octòbre passat. Sa casuda supausariá una desbranda estrategica e simbolica per l’Estat Islamic.

Lo 26 de decembre passat, las fòrças governamentalas anoncièron lo començament de la segonda fasa de l’ofensiva, que i participan los peshmèrgas curds e las milícias shiitas qu'ara ja fan partida de las fòrças de seguretat. L’armada iraquiana a tanben lo sosten de divèrsas armadas internacionalas, dont la francesa e l’italiana.

L'utilizacion d’atemptats kamikazes, de bombas artisanalas improvisadas, de mortièrs e de tiraires d’elèit son las tacticas pus letalas dels jihadistas que resistisson a l’ofensiva, ont participan aperaquí 100 000 militars iraquians. Aquelas atacas se tenon pas solament a Mossol mas a d’autres endreches del país, dont la capitala, Bagdad.