An protestat davant lo MUCÈM e an ben capitat. Las parets de veire del Musèu de las Civilizacions d’Euròpa e de la Mediterranèa a Marselha presentan ara tanben en occitan l’article catòrze de la Declaracion Universala dels Dreches Umans.

 

Una còla de militants occitanistas se quilhèron estoïcament lo 17 de decembre passat per revendicar que lo tèxt d’aquel article, present dins sèt lengas, foguèsse tanben present dins la lenga del país. Per aquela rason, i despleguèron de 12h a 16h una bandeiròla de dos mètres que pòrta lo tèxt en occitan que manca. “Còntra lei persecucions cadun a drech de cercar asil e de beneficiar de l’asil dins d’autrei país”, çò ditz l’article en question, segon la bandeiròla que tenguèron, e ara se pòt veire amb tota dignitat sus la paret del musèu.

 

Après l’accion, se bandiguèt una peticion en linha sus Change.org.

 

Bastèt d'un quinzenat de personas, d'una accion positiva e d'una peticion clara.

Imatges: Matieu Castel