Los caps politics d’Alsàcia vòlon fusionar los departaments e la region, una revendicacion istorica del movement alsacian. Hollande promet que França “farà çò que voldràn los alsacians”. Se prevei un referendum per la prima de 2013.

L’Elisi e Matignon “faràn çò que voldràn los alsacians”. Son las paraulas claras del president de la Republica Francesa, François Hollande, a prepaus de la volontat dels politicians alsacians d’unificar las diferentas institucions del país en una sola, que siá mai fòrta e qu’aja mai d’autonomia. Lo president francés o diguèt, segon lo jornal alsacian DNA, en una reünion amb una delegacion dirigida pel president del conselh regional d’Alsàcia, Philippe Richert.
 
Çò que vòlon las institucions alsacianas, es crear una sola entitat governamentala a comptar de la fusion de tres institucions: los actuals departaments del Naut Ren e del Bas Ren amb lo conselh regional d’Alsàcia. La proposicion, en fach, se presentèt a la fin de 2011. Los politics alsacians diguèron alavetz qu’un cambiament d’aquel estil permetriá, d’un costat, d’evitar la duplicitat dels ròtles entre institucions, e de l’autre, d’assumir de nòvas competéncias en matèria educativa, de transpòrt e de desvolopament economic.
 
 
Referendum a la prima de 2013
 
Los caps politics alsacians, totun, pretendon obténer un mandat popular per menar a tèrme aquel cambiament d’arquitectura institucionala, que deuriá intrar en vigor en 2014. Per o far, los dos departaments e lo conselh regional son d’acòrdi per apelar a las urnas los alsacians en un referendum en abril de 2013.
 
L’unificacion de las diferentas estructuras alsacianas en una sola es una anciana revendicacion del movement politic d’Alsàcia. L’assompcion d’un gra mai elevat d’autonomia n’es una autra.
 

 
 




Aqueste article ven del jornal catalan Nationalia.cat, amb qui Jornalet a un acòrdi de cooperacion.