Josette Moll, una legeira de Narbona Plaja, a ganhat lo concors de preseps de Jornalet per sa subrebèla grépia que representa un vilatge de la còsta de Lengadòc. Ela recebrà lèu un polit present gràcias a Macarèl, la societat que vend de produches amb las colors d'Occitània.

 
 

Durant las annadas precedentas faguèrem de concorses similars, que nos permetèron de descobrir la riquesa de las tradicions ivernalas d’Occitània tota, e de conéisser cossí se passan Calendas en cò dels legeires de Jornalet. Lo concors de 2012 lo ganhèt Quentin Willaume pel presep qu’el meteis faguèt en representant un vilatge dels Alps de Provença, e lo de 2015 lo ganhèt Beneset Thauvin del país de las Mauras, amb un presep tipicament provençal.
 
Cal soslinhar que tota la còla de Jornalet sèm estonats per la qualitat dels preseps que n’avèm recebut de fòtos. Èran de grépias subrebèlas. Gràcias a totes, avèm pogut mostrar al Mond cossí se passan Calendas en Occitània. Mercés plan pel vam e la vida que balhatz a aqueste mèdia e al país.
 
Patrici Baccou nos a mandat una fòto de çò qu’el nomena “una grépia minimalista”, que sas doas filhas fan los santons, novèls a cada Nadal.
 
 

De son costat, Joaquim Blasco, que passèt las vacanças de Calendas a Millars (Catalonha Nòrd), nos a mandat un imatge d’un bèl presep tot decorat d’elements de Nadal.

 

Clémence Lamotte nos a mandat un imatge de sa grépia talament provençala que nos a semblat quitament de sentir l’aròma de la lavanda.

 
 

E la Mirelha de Carcassona nos a mandat una fòto de la grépia annadièra que fan a l’Ostal Sirventés, sèti de la seccion d’Aude de l’Institut d’Estudis Occitans. Un subrebèl presep tradicional occitan plan complet e ben elaborat.

 
 

De soslinhar que l’Ostal Sirventés aculhirà l’8 de febrièr que ven un rescontre de legeires de Jornalet que discutiràn amb lo capredactor d’aqueste jornal amb la tòca de far un mèdia melhor. Aquel eveniment se tendrà dins l’encastre de las Febrejadas a l’Ostal Sirventés e de las activitats amb las qualas, long de 2017,  Jornalet festeja son cinquen anniversari.