Lo movement Occupy Wall Street celebrèt diluns passat lo primièr anniversari e, per aquò far, convoquèt un encerclament de la borsa per ensajar de paralisar, a l’ora de poncha, lo districte financièr de Nòva York. De desenats d’activistas del movement foguèron arrestats en una accion que, segon la polícia, amassèt un milièr de personas. Per contra, lo president de la seccion de Nòva York de la Liga Nacionala dels Avocats, Gideon Orion Oliver, raportèt 104 arrestats.

Pendent la dimenjada, los indignats estatsunidencs avián ja menat a tèrme de debats e d’accions musicalas a Nòva York, qu’es pas la sola vila dels Estats Units ont se fa de manifestacions e d’actes pel primièr anniversari del dich “movement de 99%”.
 
Los manifestants s’installèron al Pargue Zuccotti de Manhattan lo 17 de setembre de 2011 per protestar contra un sistèma financièr que benefícia los rics (1%) e prejudícia lo rèsta (99%). Puèi lo movement Occupy Wall Sreet s’estendèt per de vilas dels Estats Units, coma Oakland (Califòrnia), Salt Lake City (Utah) e Burlington (Vermont). Lo 15 de novembre, la polícia deslotgèt lo pargue e dempuèi los acampats se son consagrats a l’ocupacion de bancas, de sedenças d’entrepresas multinacionalas e de campus universitaris.
 
Los activistas an lo sosten de personalitats estatsunidencas e forestièras, coma lo prèmi Nobel d’Economia de 2001, Joseph Stiglitz, lo cineasta Michael Moore, l’actritz Susan Sarandon, lo cantaire Kanye West, lo filosòf Slavoj Žižek e l’activista Naomi Klein.