Niça ven de pèrdre una de sas grandas dònas. Ven de nos quitar a 93 ans Joseta Anelli, anciana maquisarda que luchèt contra los nazis quitament en emplegant la lenga occitana.

Nascuda Josette Lanzilloti lo 20 de març de 1924 dins la carrièra de Santa Clara de Niça vièlha, prenguèt lo maquís quand aviá a pena 18 ans. Cambièt d’identitat en se fasent apelar Jeanine Bouin, encaminèt lo corrièr dels francs tiraires e menèt de missions perilhosas. Arrestada amb son paire, que tanben èra resistent, parlava amb el en occitan durant la detencion. “Foguèt torturada per la Gestapo sota lu uelhs de son paire que l’implorèt en niçard de pas parlar”, çò rapòrta Nice-Matin. “Es en occitan que son paire la suplica de donar ges de nom”, çò confirma Aquò d’Aquí. Joseta Anelli diguèt pas res, tota muda jos los còps e las cremaduras.

Foguèt liberada per las tropas estatsunidencas a Marselha après tres meses de detencion. Puèi, dediquèt caduna de las decoracions que recebèt als 23 resistents niçards que foguèron fusilhats sul baloard de l’Ariana. “Despuei fasiá pauc parlar d’ela”, çò rapòrta Aquò d’Aquí.