L’èrsa de freg que patisson lo centre e l’èst d’Euròpa a tuat un trentenat de personas, mas s’acarnassís mai que mai suls pus paures e suls refugiats. Dins aquel sens las organizacions umanitàrias avertisson dels efièches qu’aquel freg a sus las aperaquí 15 000 personas que vivon miserablament dins de campaments precaris de la dicha rota dels Balcans.

Diluns passat, la Comission Europèa diguèt que las condicions d’aqueles refugiats èran “insuportablas” e avertiguèt que la “responsabilitat” per melhorar aquela situacion pesava sus las autoritats grègas.

En mai d’aquò, lo Comitat pels Refugiats de l’ÒNU a sollicitat lo govèrn d'Atenas per menar sul continent los milièrs de refugiats que se tròban dins de campaments sus divèrsas illas de la Mar Egèa per que sián aculhits temporàriament dins d’apartaments, en cò de familhas d’aculhença e d’autras installacions. Mas sembla qu’aquel transpòrt arribarà tròp tard.

“Es un baujum d’aver de menors en una sensacion termica de mens quinze grases jos una tenda sens condicions, de qualitat fòrça bassa”, çò disiá ièr a TV3 lo coordenaire de l’ONG Proactiva Open Arms, Òscar Camps. Aquela organizacion umanitària catalana trabalha dins l’illa de Lèsbos en ajudant de centenats de familhas que subrevivon dins de tendas jos la nèu, sens mejans e dins de condicions de mai en mai fragilas. “Evidentament aquò es un baujum, mas es de mal saber se son melhor sul continent. Per nosautres, los que vesèm a Moria son dins de condicions absoludament precàrias”.

Proactiva Open Arms es una ONG compausada mai que mai de socorristas amb la tòca de salvar de vidas dels que se nègan dins la mar, mas fa qualques jorns que veson pas arribar cap de nau en Grècia. Los a arrestats lo temporal de mar, mas afirman que quand las èrsas seràn davaladas tornaràn venir malgrat la nèu que cobrís tot lo camp.

La situacion se repetís en d’autres endreches dels Balcans.

Aürosament, segon la prevision metereologica, l’èrsa de freg comença uèi de se retirar.

 

'@AJEWeather: Snow weighs down on the tents in Moria refugee camp, island of Lesbos @aiww Video Philippa Kempson pic.twitter.com/LXEpddtwT2

— Willem J. Bod (@WillemBod) 8 de gener de 2017

More photos #Moria#Lesvos today. Miserable conditions for #refugeesgr a direct consequence of #EUTurkeydeal  @tsipras_eu@EU_Commissionpic.twitter.com/Kzo9x4PRpK

— Giorgos Kosmopoulos (@GiorgosKosmop) 7 de gener de 2017