Lo primièr procès d’un “dalhaire de cadièras” se tenguèt diluns passat, 9 de genièr, a Dacs (Shalòssa). Se jutjava Jon Palais pel raubatòri de 14 cadièras en octòbre de 2015 dins una agéncia de la banca BNP Paribas a París. L'acusat recebiá lo sosten de nombrosas associacions, sindicats e movements politics del temps que mai de 2000 personas acampavan davant la cort de justícia. Èra defendut per las avocatas Eva e Caroline Joly. Segon La Setmana, Jon Palais risca 5 ans de preson e una multa de 75 000 èuros, e mai se BNP Paribas aviá demandat un èuro de damatges e interèsses e brilhèt per son abséncia a l’audéncia. En mai d’aquò, Attac precisa que l’estat francés a demandat l'eslargiment de l'acusat. Lo verdicte serà rendut lo 23 de genièr que ven.

Jutjavan Jon Palais per una accion revendicativa que cercava de denonciar “l’impunitat de las bancas qu’organizan l’evasion fiscala”. La Setmana precisa que Jon Palais “a regularament participat a las accions non violentas de Bizi” (Viure), un movement altermondialista del Bascoat Nòrd. Una d’aquelas accions foguèt aquela “requisicion ciutadana de cadièras” en febrièr de 2015 que descadenèt lo movement dels Dalhaires de cadièras, un collectiu ciutadan que per mejan de la requisicion de cadièras dins las agéncias bancàrias cèrca de denonciar l’evasion fiscala.

Una sala d’audiéncia tròp pichona

Eva e Caroline Joly, las avocatas de Jon Palais intravan al Tribunal de Granda Instància de Dacs a 13h20 jos las aclamacions d’una molonada nombrosa venguda per sostenir los Dalhaires de cadièras. La sala d’audiéncia venguèt tròp petita per aculhir las nombrosas personalitats e jornalistas presents.

Jon Palais assumiguèt las accions de requisicion de cadièras e n’expausèt la legitimitat.

Sos testimònis, Vincent Drezet e Antoine Peillon, intervenguèron per denonciar los paradises fiscals e lo ròtle que i jòga la banca BNP Paribas, del temps que defendèron la legitimitat de la desobesissença civila.

La BNP Paribas declara un tèrç de sos beneficis dins los paradises fiscals

Dins aquel sens, Eva Joly remembrèt al tribunal que la BNP Paribas declara un tèrç de sos beneficis dins los paradises fiscals e es estada implicada dins fòrça escàndols dins los darrièras ans.

De son costat, BNP Paribas, qu’es a l’origina de la denóncia, demandava pas qu’un èuro simbolic e mandèt pas cap d’avocat a Dacs. “Una abséncia que s’aparenta a una confession de culpabilitat visiblament despassada per l’amplor de la mobilizacion ciutadana”, segon Attac.

Una mobilizacion ciutadana de las impressionantas

La Setmana rapòrta a detalh lo procès e la jornada mobilizacion ciutadana que la visquèt la capitala de Shalòssa diluns passat. Pels Dalhaires de cadièras es un succès incontestat.

Mai de 2000 personas se rassemblèron a 13h davant lo tribunal abans de marchar per las carrièras de Dacs. A partir de 14h, de personalitats sindicalas, artisticas e politicas intervenguèron per remembrar los enjòcs ecologics, economics e socias de la lucha contra l’evasion fiscala. L’eveniment tenguèt de conferéncias e de concèrts.

Ja de matin 5 candidats a l’eleccion presidenciala èran estats interpelats sus la frauda e l’optimizacion fiscala dins una taula redonda. Èran Yannick Jadot (EELV), Sandrine Charnoz, pour Benoît Hamon (PS), Pierre Larrouturou (Nouvelle Donne), Corinne Morel-Darleux per Jean-Luc Mélenchon (la France insoumise), Philippe Poutou (NPA), Charlotte Marchandise (Candidature Citoyenne). S’engatgèron a luchar contra l’evasion fiscala, çò rapòrta Attac.

La jornada acabèt sus una crida a se mobilizar durant la setmana d’accion mondiala contra l’evasion fiscala #EndTaxHeaven que començarà lo 3 d’abril, data de l’anniversari de la publicacion dels “Papièrs de Panamà”, e l’11 d’abril a l’ocasion del segon procès d’un Dalhaire de cadièras, Florent Compain, president dels Amics de la Tèrra.