L’actritz Meryl Streep recebèt diluns passat lo Glòbe d’Aur (Golden Globe) d’onor per sa carrièra e sa contribucion al mond del cinèma. Dins son discors Streep critiquèt Donald Trump, que fa gaire foguèt elegit president dels Estats Units. L’actritz remembrèt que “totes los que sèm aicí fasèm partida dels sectors mai escarnits de la societat estatsunidenca: Hollywood, los estrangièrs e la premsa”.

 

De tot biais, la critica mai dura contra Trump foguèt pas brica ironica. Streep foguèt quitament a mand de plorar mentre que parlava:

 

“Mas ongan una interpretacion m’a estonat e a enfonzat sos gafets dins mon còr. Non pas que foguèsse bona, mas èra eficaça e capitèt plan. Faguèt s'estraçar del rire lo public. Foguèt quand lo que se voliá assetar sus la cadièra pus respectada del nòstre país imitèt un jornalista andicapat. Una persona a la quala èra superior en privilègi, poder e capacitat de respondre. Quand o vegèri me trenquèt lo còr e encara pòdi pas quitar d’i pensar, pr’amor qu’èra pas un filme, èra la vida reala. E aquel instint d’umiliar, quand es interpretat per qualqu’un amb de poder, s’infiltra dins la rèsta de la vida de la rèsta de la societat. E balha, d’un cèrt biais, la permission a la rèsta del mond per que fagan la meteissa causa. La manca de respècte convida a la manca de respècte, la violéncia incita a la violéncia. Quand un poderós se servís de sa posicion per umiliar, totes i perdèm”.

 

Aquí podètz veire tot lo discors complet de Meryl Streep:

 

 

 

Çò que Streep criticava es lo moment que Trump se trufèt d’un jornalista andicapat del jornal The New York Times. Vaicí lo vidèo d’aquel moment vergonhós: