Lo  ministèri public alemand considèra que lo copilòt Andreas Lubitz foguèt lo sol responsable de la tragèdia aeriana del Puèg dels Tres Evescats (Prealps de Dinha), ont un avion A320 de la companhiá Germanwings s’escrachèt en causant la mòrt de 150 personas. Segon lo Frankfurter Allgemeine , Lubitz patissiá “un episòdi psicotic depressiu” dempuèi decembre de 2014 mas èra arribat de conciliar aquel fach amb son trabalh. Lo ministèri public alemand escarta que quina autra persona o societat que siá, coma los doctors que tractavan Lubitz o la quita Germanwings, ajan qualque responsabilitat sus l’accident.
 
Los avocats de las familhas de las victimas an insistit en fòrça escasenças sul fach que Lubitz, que desactivèt volontàriament lo pilòt automatic per entamenar la davalada e esclafar volontàriament l’avion, auriá degut èsser mai susvelhat de la part de la societat, qu’es la filiala “low-còst” del grop Lufthansa. Qualques parents presentèron quitament una denóncia contra l’escòla de vòl estatsunidenca ATCA (Airline Training Center Arizona) ont Lubitz s’entraïnèt.
 
L’accident de Germanwings a generat un debat sus quin deu èsser lo seguiment que las societats aerianas poirián far de lors emplegats, mai que mai los qu'an accès a las comandas de l’avion, per evitar de situacions similaras.