Las principalas comunas mediterranèas d’Occitània e de Catalonha an fach front comun per exigir dels estats francés e espanhòl que melhoren l’interconnexion ferrioviària dels dos païses. S’amassèron dijòus passat a Tarragona dins la novena cima del Comitat de Vilas e de las Aglomeracions per la Nauta Velocitat e l’Interconnexion del Corredor Mediterranèu en se presentant coma un grop de pression de las comunas suls estats respectius e en signant un manifèst ont revendican, sustot, que lo Corredor Mediterranèu prenga forma, davant los govèrns francés e espanhol que “complisson pas lors engatjaments” amb aquel ais vertebral.
 
Lo comitat es integrat per un dotzenat de vilas dont Besièrs, Carcassona, Montpelhièr, Narbona, Nimes o Tolosa del costat occitan, e de vilas coma Barcelona, Figueres, Girona, Lhèida, Tarragona, Perpinhan o Reus del costat catalan.
 
De fach, segon lo cònsol de Tarragona, Josep Fèlix Ballesteros, la manca d’implicacion dels govèrns es “pus grèva” del costat francés, pr’amor que i a pas cap d’engatjament ferme a respècte d’aquelas connexions, çò rapòrta Ara.
 
Entre d’autres subjèctes tocant la manca de connexions ferrioviàrias, se parlèt del besonh de melhorar lo servici transfrontalièr e lo tròç de Montpelhièr a Perpinhan, qu’es pas encara de nauta velocitat.