Lo monarca apèla a las “valors que brilhèron pendent la transicion”. Lo govèrn catalan respond que s’i sentís pas identificat: “Dempuèi fòrça temps, en Catalonha, se prepausa de proposicions e de solucions qu’en cap de cas son de quimèras”, çò diguèt lo pòrtaparaula del govèrn catatan, Francesc Homs.

Dimars passat se publiquèt una letra del rei espanhòl Joan-Carles I de Borbon ont fa un apèl a l’unitat dels espanhòls. Just una setmana après l’istorica manifestacion independentista a Barcelona, aquela letra dobèrta del rei afirma que las dificultats se superaràn solament se los espanhòls agisson “amassa e en remar a l’encòp”. Borbon apèla “a las valors que brilhèron pendent la transicion democratica” e apond que dins las circonstàncias actualas, “dividir de fòrças e perseguir de quimèras” seriá pièger.
 
Coma o explican de fonts del burèu del rei a l’agéncia Europa Press, lo messatge es estat una iniciativa del rei Joan-Carles, e mai se consultèt lo president del govèrn espanhòl, Mariano Rajoy, qu’aprovèt l’iniciativa.