Jean-François Ducay ganhet la medalha d’argent en tennis de taula paralimpic aus Juecs de Londres. Divendres passat venguet cituadan d’onor de sa vila, Panasòu (País de la Vinhana) e reçaubet la medalha dau Conselh Generau de Nauta Vinhana.

A la debuta dau mes de setembre, ‘chabet segond de l’espròva de tennis de taula daus Juecs Paralimpics de Londres. En finala, lo Lemosin fuguet dominat en quatre partidas (4-11, 6-11, 11-3, 6-11), per l’Alemand Holger Nikelis, desjà champion paralimpic a Atenas en 2004.
 
Paraplegic dempuei l’atge de 15 ans, a la seguda d’un accident de plonjon, s’entraïna una dotzena d’oras per setmana. “Qu’es plan exigent”, declaret au jornau francés l’Equipe, “e lo niveu a fòrça aumentat questas darrieras annadas, adonc ai pas d’activitat professionala. La Federacion d’espòrt per andicapats m’ajuda e ai daus partenaris per mos desplaçaments, mas après, per viure, qu’es plan malaisat...”
 
Lo Conselh Generau de Nauta Vinhana lo sosten en li autrejar ‘na borsa annadiera e sa presidenta, Marie-Françoise Perol-Dumont, lo volguet onorar en li acordar la medalha dau departament. Marcat dins un club de la vila de Panasòu, rasis Limòtges, ne’n venguet divendres passat ciutadan d’onor.
 
 
 
 
Maime Caillon