La situacion al Sahara Occidental se degrada lèu. En agost passat Marròc ensagèt d’ocupar Al Kuwayra, un endrech estrategic al sud del país jol contraròtle de la Republica Aràbia Sahariana Democratica (RASD). Las tropas marroquinas volián jónher la frontièra amb Mauritània e talhar lo sol accès a la mar de la RASD. De soldats del Front Polisario defendèron la posicion e l’ÒNU negocièt una alta al fuòc fragila entre las doas armadas, çò rapòrta VilaWeb.
 
Ara, las posicions del Polisario e de l’armada de Marròc son en fàcia, desseparadas solament per cent mètres de tèrra, e los incidents son frequents. Marròc fa volar de drònes sus las posicions de las tropas saharianas, qu'an menaçat de los tombar.
 
Lo president e lo ministre de la defensa de la RASD an vesitat la zòna per afortir que vòlon empedir que Marròc avance de posicions e enquitrane una estrada, coma o pretendiá.
 
Lo ministre de la defensa de la RASD, Abd Allahi Lahbib Balal, explica tanben que totes los movements son comunicats a l’ÒNU per que la mission cargada de susvelhar la patz al Sahara pòsca constatar çò que se passa sus plaça. Lo govèrn saharian a montat lo ton de sas criticas a l’ÒNU. Balal a dich que la MINURSO, la mission de l’ÒNU, “es al Sahara per organizar un referendum d’autodeterminacion e non pas per manténer l’statu quo”.
 
Après dos decennis de trèva, la RASD refortís son armada. Tant que lo conflicte se resòlv pas, i a cada còp mai de voses dins lo Front Polisario que reclaman de tornar a la guèrra contra Marròc. Es un moment mai que mai delicat pels saharians, perque Marròc vòl que la RASD siá expulsada de l’Organizacion per l'Unitat Africana, la principala organizacion internacionala que ne fa partida.
 
Al Kuwayra es ara una vila practicament abandonada dins la peninsula de Ras Nuadhibu, una lista de tèrra fòrça estrecha, de solament quinze quilomètres, devesida entre la RASD e Mauritània. Del costat saharian de la peninsula i a solament Al Kuwayra, mentre que del costat de Mauritània i a Nuadhibu, una vila de mai de cent mila abitants, principal pòrt de Mauritània e capitala economica del país. Es tanben lo pòrt d’ont partisson las naus amb d’emigrants que vòlon arribar a las illas Canàrias. Après l’acòrdi d’alta al fuòc entre Marròc e lo Front Polisario, la zòna restèt practicament abandonada e i vivián solament de pichons grops de pescadors. De fach, i patrolhava la polícia mauritana, e mai se fa pas partida de lor país.
 
Aquel conflicte es tanben important perque Al Kuwayra es un passatge principal de contrabanda, coma o remembra totjorn lo Front Polisario. La television publica sahariana a sovent emés d'imatges de cargaments d’ashish que las tropas de la RASD an confiscat a de trafegaires marroquins.