L’enquèsta judiciària sus la mòrt de Rémi Fraisse risca de s’acabar sus un non-luòc segon lo paire del jove tolosan tuat en octòbre de 2014 per una granada que lancèt un gendarma dins l’encastre de la repression d’una protèsta contra la construccion d’una restanca a Sivens (Galhaqués). La familha es estada informada de la barradura de l’instruccion, començada fa mai de dos ans sens que cap de responsable siá pas mes en examen. Ara, los avocats de la familha an fach lors denóncias contra los responsables civils e militars del drama, çò rapòrta Reporterre.
 
E mai se las jutgessas d’instruccion tolosanas Anissa Oumohand e Elodie Billot decidiguèron l’11 de genièr passat de comunicar lor dorsièr al procuraire, los avocats de la familha se servisson del relambi legal de plusors meses abans que lo procuraire valide lo non-luòc del dorsièr. Lo 18 de genièr, los avocats de la partida civila faguèron lor denóncia per “falses testimoniatges” contra tres gendarmas interrogats dins l’encastre de l’enquèsta: lo sergent J., principal mes en causa, lo major A., comandant de l’escabòt que se trobava a proximitat de Rémi Fraisse e lo comandant L. del gropament tactic de gendarmariá desplaçat aquel ser ailà. Segon lo quotidian ecologista, s’agís de tres personatges clau dins la compreneson dels eveniments e dins la cadena de comandament militar presenta sus plaça.  “I a de contradiccions flagrantas entre las diferentas audicions de militars” —çò ditz Jean-Pierre Fraisse, fraire del paure Rémi— “son de personas juradas que càmbian de version entre lors audicions”. (Escotatz dins l’àudio çai jonch sa convèrsa amb los confraires de Reporterre).
 
Los avocats de la familha an fach las denóncias a un tribunal de granda instància de París. Mas a Tolosa an fach encara doas autras denóncias, dont una concernís l’Inspeccion Generala de la Gendarmariá dicha Nacionala (IGGN), qu’èra estada cargada pels jutges d’instruccion de menar las audicions de l’ensems dels testimònis, a partir de genièr 2015 fins a la prima passada. Un dels enquestaires, lo capitani M., cap de la seccion de recèrca de Tolosa, es  a l’ora d’ara acusat de “subornacion de testimònis”.
 
Es justament aquel capitani qu’èra estat identificat per plusors testimònis qu’avián denonciat a Raporterre de pressions psicologicas al cors de lor audicion, subretot en çò que tanh un ponch clau: la preséncia de gendarmas fòrça lor zòna d’operacion al moment de la mòrt de Rémi Fraisse.
 
Fin finala, una tresena denóncia es en cors de depaus a Tolosa contra lo prefècte del departament de Tarn, Thierry Gentilhomme, acusat d’omicidi involontari. Los demandants considèran qu’el seriá lo primièr responsable civil mes en causa dins la cadena de comandament de las operacions de gendarmariá del 25 d’octòbre de 2014, jorn que Fraisse foguèt tuat. Fins ara los jutges d’instruccion tolosans an pas jamai acceptat d’entendre Gentilhomme ni son director de gabinet, Yves Mathis, qu’èra alavetz cargat del dorsièr de Sivens. Mas son eles que representavan l’estat francés dins lo departament al moment del drama, e an pas jamai explicat perqué aquel ser i aviá pas cap d’autoritat civila sus plaça, coma o denóncia lo defensor dels dreches dins son rapòrt.
 
Mentretant, lo paire de Rémi, Jean-Pierre Fraisse, mostrava son desespèr al quotidian ecologista.. “I a pasmens agut mòrt d’òme, a 20 ans, es gaireben un enfant. Es talament absurde, çò que s’es passat, o sabètz ben a Reporterre, amb lo trabalh qu’avetz menat, s’es pas res passat a l’endrech ont èra Rémi quand foguèt tuat pels gendarmas. Es surrealista qu’òm s’encamine devèrs un non-luòc”.