Las bancas centralas dels estats dispausan normalament de grandas resèrvas d’aur coma depaus de valor pauc fluctuant, en comparason amb los sistèmas monetaris. Segon los darrièrs calculs, las principalas resèrvas d’aur son las dels Estats Units amb 8133,5 tonas, d’Alemanha amb 3395,5 tonas, del Fons Monetari Internacional amb 2814 tonas, d’Itàlia amb 2451,8 tonas e de França amb 2435,4 tonas. En seisena posicion, ja mai luènh, i a China amb 1054,1 tonas.
 
En una decision pauc comuna, la Banca de França a publicat un vidèo de “La Souterraine”, la sala ont s’emmagazina las resèrvas d’aur de l’Estat.
 
Dins la sala sosterranha, protegida per de dispositius de seguretat enòrmes, sonque i pòdon intrar cinc agents; plaçada a qualques 30 mètres jos lo sèti de la Banca de França de París, fa 11 000 mètres cairats. L’aur i es amassat en forma de barras de 12,5 quilos o en de lingòts d’un quilo, cadun avalorat a 43 000 èuros. En total, las 2435 tonas d’aur acomoladas dins La Souterraine an un prètz de mercat de gaireben cent miliards d’èuros.