Trobada occitana a Narbona
 
Lo mes de febrièr se dobrirà a Narbona, tre lo dimècres 1èr, a 5 oras del vèspre, amb una Trobada occitana a la Mediatèca amb la participacion dels poètas Rotland Pecot, Franc Bardòu e Jaume Privat e dels musicaires-compositors Sandra Hurtado-Ròs e Gerard Zuchetto qu’apiejaràn lors intervencions suls libres e CD sortits dins lo segond semèstre de 2016, cò de Tròba Vox.
 
 
Pintura, bièrra, Jornalet e Alaric per Las Febrejadas
 
 
Del 3 al 10 de febrièr, l’Ostal Sirventés (79, la Trivala, Carcassona) se met a l’ora de las Febrejadas, amb quatre rendètz-vos qu’aligan pintura, gastronomia, comunicacion, istòria e etnologia.
 
Lo divendres 3 de febrièr, a 18h30, se farà l’estrena d’una mòstra de pinturas de Miquèla Fumat: Agachadas / Regards. L’artista, que viu a Narbona, es pastada d’influéncias mediterranèas. Cada gèst se noirís de lum per balhar a cada cara un esclat particulièr.  Cada tablèu presenta un retrach de mond d’aicí o d’endacòm mai, de mainatges o d’adultes ont senhoreja la fòrça dels agaches.
 
Diluns 6 de febrièr, a 19 h (sus reservacion: +33(0)4 68 25 19 78 o ostal.sirventes(a)wanadoo.fr; participacion: 10 èuros), se farà una tasta qu’aligarà cervesas (aquelas de la brassariá Ciutat a Carcassona) e formatges: de maridatges a descobrir e a se ne perlupar!
 
Dimècres 8 de febrièr, a 18h30, Ferriòl Macip farà lo punt suls 5 ans de vida del jornal quotidian e informatic Jornalet  qu’anima dempuèi Barcelona per balhar un agach occitan sus l’actualitat dels pòbles e per ofrir d’espacis de discussion e de tribunas.
 
Divendres 10 de febrièr (18h30), lo mont Alaric serà presentat per Felip Marcy (Vilatges al País) jos d’angles divèrses, represes dins l’obratge recentament paregut que met endavant sa plaça particulara dins lo païsatge audenc entre Corbièras e Menerbés.
 
 
Moussu T a Concas d’Orbièl
 
Dissabte 4, Moussu T e los Jovents seràn a Concas d’Orbièl per un recital en serada al teatre de la localitat, a l’iniciativa de Music’Al Sol amb lo concors de l’IEO-Aude. Lo torn de cant s’apiejarà sus lor recent CD Navega per menar l’auditòri del costat de Marselha e de La Ciutat.
 
Un repais etic precedís la serada amb al menut un plat a faire estrementir los tradicionalistas: un freginat vegetarian! Aürosament, l’opcion freginat-freginat es encara possibla! L’aficha plaça clarament l’expression artistica occitana dins las musicas del Mond, vist que lo Mond es tanben Occitània!
 
 
La mòstra bèla sus Aude e l’occitan
 
Dimars 14 de febrièr, a 6 oras del vèspre, los Archius Departamentals audencs organizaràn l’estrena de la mòstra “Occitan, Occitània” que serà presentada dins sos locals fins a la fin del mes de junh. Òc, sabi plan: lo 14 de febrièr aquò es la Sant Valentin. Alara, se sètz del costat de Carcassona, aprofitatz-o per dire vòstre amor de la lenga d’Òc!
 
Los documents presentats cobrisson dètz sègles d’istòria de nòstra lenga. Los panèus e la brocadura d’acompanhament son en dobla version: occitan e francés.
 
Lengadòc ièr, Occitania uèi: nòstra contrada ten son nom, dempuèi de sègles, de la lenga que foguèt sieuna, qu’es totjorn sieuna. Mas que sabèm d’aquesta lenga, de sas originas , de son espandiment, dels combats qu’engimbrèt? Los Archius departementals d’Aude, amb lo concors de l’Institut d’Estudis Occitans, vos convidan a trapar de responsas a aquestas questions en vistalhant la mòstra consacrada a la lenga occitana, a sos usatges e als moviments que n’assegurèron la defensa, dempuèi l’Edat Mejana (primièras aparicions dins las cartas de tèrmes occitans als sègles X-XI) fins als ans 1970-75 (moviments occitanistas), sens doblidar lo Felibritge. Documents originals, objèctes, afichas, papierons, fotografias e òbras d’art son estats recampats per faire tornar viure un passat recent o vièlh.  
 
 
E tanben…
 
Los dançaires se traparàn a Limós lo divendres 3 de febrièr pel balèti mesadièr de Tradenbulle o a Camplong d’Aude lo dissabte 25 amb Nhac e Bruno Sentou.
 
Lo Carnaval de Limós se perseguís fins al 2 d’abril amb las sortidas menadas en febrièr per Las Encantadas, Las Popinetas (dissabte 4); Los Blanquetièrs (dimenge 5); Los Bronzinaires, Los Rambalhurs (dissabte 11); Lo Parador (dimenge 12); Los Sieurs d’Arques (dissabte 18); Las Femnas (dimenge 19); Los Pichons, Los Taps (dissabte 25); l’Aragon (dimenge 26); Los Ancians (dimars 28) etc.
 
Lo GARAE clavarà las projeccions dels films en omenatge a Danièl Fabre amb la presentacion de La caça de l’ós a St-Lorenç de Cerdanç lo dijòus 9 de febrièr al cinèma Colisèu a Carcassona.
 
L’IEO-Aude organiza un carri per anar escotar Nadau a Pau lo 18 de febrièr, mas lo Jan de Nadau serà en version “leugièra” en concèrt (amb La Sauze en primièra partida) tre lo dissabte 25 de febrièr a Grussan, abans lo passatge de Nadau lo dissabte 22 d’abril a Vilamostausson.
 
Los lipets prendràn part a la taulejada de la Nuèit de la Trufa a Vilanòva de Menerbés (lo dissabte 25 de febrièr).
 
A caval sus febrièr e març (del 21 de febrièr al 4 de març), Fasètz la Lenga en Cabardés festejarà sos 20 ans. I tornarem, mas vos senhalam tre ara la jornada especifica d’aqueste anniversari amb una programacion a res-non-còsta lo dissabte 25 de febrièr a Ventenac de Cabardés. Lo vèspre, los mainatges se poiràn amusar a jòcs de fusta e dançar amb Sors les mains d’Tes Poches. En fin de vèspre, Alèm Surre-Garcia tornarà plaçar Occitània dins l’Istòria. En serada, Coriandre menarà lo balèti.
 
Vesètz qu’en país d’Aude que, se coma de pertot febrièr es plan cortet, es tanben plan valent e plan occitanizat!
 
 
 
 
Alan Roch