L’ensenhament de l’occitan al Collègi Cité de Narbona perilha. Dempuèi tres ans, lo centre prepausa una sèria de corses “occitan bilingüe” amb tres oras tre la 6a e doas oras pels autres nivèls. Mas, per l’an que ven, l’establiment prepausa de suprimir una ora en 6a, benlèu una autra en 5a e d’agropar las 4a e 3a, çò que poiriá far quatre oras d’occitan en mens per setmana.
 
E mai s’es la lenga del país e  que los escolans ajan drech de ne recebre l’ensenhament, aquel cursus d’occitan assegura la lenga als calandrons de Narbonés. L’an que ven,  i aurà almens 18 calandrons en 6a, sonque per una de las Calandretas de l’encontrada.
 
Per aquela rason, e sustot perque aquela decision administrativa constituiriá una “incomprensibla regression dins lors condicions d’aprendissatge”, de personals del collègi, de parents d’escolans e de ciutadans an lançat una peticion en linha sus Change.org. Demandan lo mantenement d’un collègi a 17 classas l‘an que ven, “dins l’interès dels enfants”.