L’Organizacion de las Nacions Unidas a manifestat son chepic per la resurgéncia de l’intolerància e de la xenofobia. Dins un messatge vidèo, fach a l’ocasion de la jornada internacionala dedicada a la memòria de las victimas de l’Olocaust, lo secretari general de l’ÒNU, António Guterres, a declarat que lo Mond a lo dever de se remembrar aquela tragèdia incomparabla, e a avertit del retorn d’aqueles sentiments contra cèrts collectius umans.
 
“L’Olocaust foguèt pas un simple produch de la foliá dels criminals nazis, foguèt l’apogèu de sègles d’òdi e de discriminacion dels josieus”, çò ditz lo messatge de Guterres. “Per malastre, e contra nòstra intencion, l’antisemitisme contunha de proliferar. Vivèm tanben una creissença plan preocupanta de l’extremisme, del racisme e de l’òdi dirigit contra los musulmans. L’irracionalitat e l’intolerància tornan”, çò avertís del temps que precisa qu’aquela tendéncia “contraven a las valors consagradas dins la Carta de las Nacions Unidas e la Declaracion Universala dels Dreches Umans”.
 
“L’ÒNU poirà pas jamai demorar en silenci davant la sofrença umana e contunharà de defendre los mai vulnerables per menar los bòias davant la justícia”, çò conclutz Guterres.
 
La jornada internacionala dedicada a la memòria de las victimas de l’Olocaust se ten cada 27 de genièr, en commemoracion del jorn que l’armada sovietica liberèt lo camp d’Auschwitz en 1945.