Vaquí venir febrièr amb la represa en Superliga l’11 de febrièr pels Dragons e en Championship tre aqueste 4 de febrièr pel Tolosa Olimpic, mas aquesta dimenjada en cap d’aficha se debanava lo dèrbi  Limós-Carcassona
 
 
Limós s’envòla aprèp la pausa
 
Mai de 300 personas aprecièron l’adòba de singlar abans la partida Limós-Carcassona. L’afrontament foguèt sarrat dins lo primièr temps (16-14 pels locals a la pausa). Dins lo segond temps, Limós se destaquèt e l’AS Carcassona poguèt pas tornar: 34-28 al planchòt final.
 
Victòria aisida de Lesinhan sus Albi: 24-2 a la pausa e 56-20 a la fin. Avinhon ataca la partida plan melhor que Vilanòva e ganha 36-24. Sent Gaudenç e Palau se tenon fins a la 70a minuta, mas los Orses marcan sus la fin: 30-16.
 
Dissabte, Dragonets-Tolosa se poguèt pas jogar que lo terren de Sant Estève èra jos l’aiga.
 
Dimenge, sesilha de ratrapatge amb aqueste rescontre e lo 1/8n de Copa entre Palau e Limós.
 
 
Manca d’òli cò dels Dragons
 
Dissabte, en partida amistosa, los Dragons recebián a Brutus lo campion Wigan. Aprèp una bona entamenada, patiguèron dins lo primièr temps: 20-6 pels angleses a la pausa. Los catalans mostrèron mai d’esperit d’iniciativa dins lo segond temps e tornèron a 22-26.
 
Greg Bird serà plan lo cap de fila de la formacion e es amb plaser que se tornèt trapar Inu en caçaire d’ensages. Demòra una quinzenada per pas mancar la recepcion de Warrington lo 11 de febrièr.
 
 
Los Dògols a Blanhac
 
Aqueste dissabte 4 de febrièr, sus la pelena de Blanhac, a 3 e mièja del vèspre, lo Tolosa Olimpic començarà la sason de Championship (lo nivèl en dejós de la Superliga) amb la recepcion de Batley Bulldogs. Los occitans gardan l’esquipa de l’an passat, amb solament l’arribada del catalan Robin. Objectiu bèl e ambiciós fixat: acabar dins los 4 primièrs per jogar dins la pola de barratge per la montada en Superliga. La partida de dissabte serà una primièra indica sul ròtle que los “blau e blanc” poiràn jogar dins la competicion.
 
 
 
Alan Roch