Actualitats
Un estudi de l’Universitat de Can revèla la grèva toxicitat del milhòc OGM
Pendent dos ans, d’investigators franceses an estudiat los efièches del milhòc OGM NK603 —un milhòc transgenic produsit pel grop Monsanto— sus 200 rats. L’OGM (organisme geneticament modificat) se revèla fòrça toxic e sovent mortal pels rosegaires.
Segon d’informacions de l’AFP, un rapòrt, que serà lèu publicat en linha per la revista internacionala de toxicologia alimentària Food and Chemical Toxicology, los rats alimentats pendent dos ans amb un milhòc OGM morisson mai joves e desvolopan mai de càncers que los autres, que son alimentats amb de milhòc non modificat geneticament. L’OGM en question es tractat dins cèrts cases amb l’erbicida principal del grop Montsanto, lo Roundup.
“Los resultats revèlan de mortalitats plan mai rapidas e mai fòrtas al cors del consume [dels OGM]”, çò diguèt a l’AFP Gilles-Eric Seralini, cercaire a l’universitat de Can (França), qu’a dirigit la còla de l’estudi. Lo cercaire apond: “Los resultats son alarmants. S’obsèrva, per exemple, de dos a tres còps mai de mortalitat en las femèlas tractadas. I a de dos a tres cops mai de tumors en los rats tractats dels dos sèxes”.
“Per primièr còp al Mond, un OGM e un pesticida son estats avalorats pel lor impacte sus la santat mai longament que las agéncias sanitàrias, los govèrns e las indústrias”, çò diguèt a l’AFP lo professor Seralini.
Segon lo professor, lo milhòc NK603, OGM de Monsanto, s’èra testat que sus un periòde de tres meses, un periòde tròp cort per detectar l’aparicion de las tumors. Qualques OGM ja se testèron fa tres ans, mas pas jamai amb d’analisis tan prigondas.
“Es lo primièr còp que lo Roundup es testat a tèrme long” çò ditz Seralini. Fins al present, solament lo principi actiu d’aquel erbicida sens los sieus adjuvants s’èra testat mai de sièis meses. “Aqueles son los melhors tèstes que se pòdon far abans de testar en l’òme”, çò afirma lo cercaire.
Segon l’AFP, qu’a recebut una còpia de l’article publicat dins Food and Chemical Toxicology, se mòstra de rats femes de laboratòri qu’an desvolopat de tumors mai gròssas que de balas de ping-pong.
De protèstas a Nimes
Dimècres passat, de militants anti-OGM manifestèron un còp de mai davant l’intrada de la sedença de Monsanto a Nimes. La direccion refusèt tornarmai los recebre.
Los militants demandan una reünion amb los representants de la multinacionala agricòla, per s’assabentar de las activitats menadas. Lo mes de mai passat, los militants foguèron recebuts per primièr còp pels representants, sens qu’aqueles respondèsson vertadièrament las questions del collectiu. De fach, se sospecha que l’usina produsís de lachugas geneticament modificadas. Dimècres cap de vesita foguèt acceptada, per levar lo dobte.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Mercès a tu Julien de partejar tas coneisséncias preciosas amb nosaus, e pel PDF tanben ! ;)
Pensi pas que leis OGM siágan un problemi de principi : lo plasmidi/retrovirus es normalament integrat dins l'ADN cromosomic, e tre la segonda generacion après modificacion deurían pas mai trapar de plasmidi dins les celulas nòvas. Après li a totjorn un risc de contaminacion d'autrei espeças (probablament vegetalas, sabi pas si pòu passar d'un vegetau a un animau) per la trasmission orizontala abituala, tras de virus naturaus etc, mai es un autre problèma.
Cresi que le problèma mager, avías rason de le soslinhar precedentament, es qu'aquesto milh es estat modificat per apondre una resistança au roundup, e que la mager part dei OGM son totjorn de conariás d'aquesta mena : siá modificar per poder botar mai d'erbicidi (plantas "roundup ready" principalament) siá modificar per que la planta produse insecticidi d'esper-ela (plantas "Bt" principalament). S'agitz totjorn de jogar ambé de vias metabolicas dangerosas, pas simplament d'apondre de pichon detalhs qualitatius. L'estudi de Seralini soslinha que les efèt de l'OGM son d'una natura un pauc similara ais efèt qu'aviá ja notat per lo roundup sensa OGM (dins un autre estudi contestat), aquo sariá una indicacion d'una dangerositat especifica dau milh roundup-ready, e qu'en meme temps si pòu pas generalisar a toei les OGM.
Enfin tot aquò es fòrça tecnic, siáu mens segur de ço que disi aqui que de ço que disiáu dins mon promier comentari.
#5 Plan mercés a Julien de Marsilha per sas precisions ! Tant val dire que lo round up es una poison, e que los plasmids que modifican geneticament los orgnismes agroindustrials devon agir tanben coma agent intercalant de l'ADN, provocant doncas de mutacions cancerigènas. Aquí doncas, podèm escridassar a la necessitat imperiosa d'un principi sanitari de precaucion, estant que se las partidas genomicas modificantas dels OGM pòdon cancerizar un autre organisme, aquò pòt far pro seriosament pensar al fait qu'aquelas partidas genomicas modificantas pòdon plan efectivament migrar d'una espècia a una autra, d'un biais cap e tot anarquic e incontrarotlable. L'agroindustria capitalista jòga amb un fuòc brandal, e son nosautres, rosegaires o pas, que nos i cremam totes, lèu o tard.
Urosament que sèm pas de rosigaires, macarèl!
Aqui la publicacion, en version accessibla per toei : http://www.rue89.com/sites/news/files/assets/document/2012/09/fct_seralini-al_0.pdf
D'en promier, respòndi a Eric : "L'OGM es precisament modificat geneticament per endurar sens problèma màger la preséncia letala dels pesticidis coma lo "round up", per exemple. Benlèu l'OGM o poirà endurar, mas pas los rats" => aquo era l'ipotèsi privilegiada avanç de faire l'estudi, mai an fach de grops "GMO", "GMO+R" e "R" (GMO=OGM R=roundup), e fin finala la conclusion es que l'OGM en question es dangerós finda sensa roundup.
Puèi, balhi mon vejaire coma fisician dei particulas (adonc siáu vertadierament pas especialiste mai la metòda cientifica es la metòda cientifica, e leis estatisticas son leis estatisticas) : l'estudi mi sembla relativament solida, embé d'estatisticas que son luenh de la qualitat que consideram bòn coma pròva en fisica dei particula mai que sembla superiora a la qualitat tipica d'estudi dei Monsanto&Cia. Faire un estudi mai precís demandariá mai de moiens, au manco mai de rats, e probablament tanben mai de ressorgas umanas. E sabem ben que finançar un estudi contre leis OGM es pas aisit, subretot en aquestei temps post-sarkozystes ambé un fum de demandas ANR etc, mentre que leis estudi pro-OGM son pagats per una industria importanta.
Lo solet problèma que vesi, iéu, es que li a sonque una parcela d'OGM, adonc lei possibles problemas de cultivacion (que podrian bensai explicar l'efèt perque aquesta varietat de rats es fòrça sensibla) son d'apondre coma error sistematica (e cau qu'un especialiste regarde lei detalhs per saupre se es ben contrarotlada), mentre que si li aviá mantunas parcelas l'error podriá estre integrada coma error estatistica.
De segur ai pas considerat la possibilitat que l'estudi siágue simplament facha de chifras "bidonadas". Es possible, li a de precedents dins la recerca, mais sariá vito-vito un suicidi professional.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari