Las primièras damas de Nigèr, Burkina Faso e Benin an promés de “metre fin al flagèl de las mutilacions genitalas femeninas” dins lors païses, pendent una conferéncia internacionala contra aquela practica que se tenguèt ièr dimars a Roma.
 
Aperaquí 200 milions de filhas e de femnas son estats somesas a aquela practica, que consistís a l’amputacion totala o parciala dels organs genitals femenins extèrnes.
 
“La mutilacion genitala femenina es una practica barbara”, ço diguèt la primièra dama de Nigèr, Lalla Malika Issoufou, e assegurèt que son marit, Mahamadou Issoufou, sosten los esfòrces per l’eradicar. La majoritat dels païses africans an introduch de leis contra la mutilacion genitala femenina, e mai se generalament son aplicadas d’un biais pauc estricte.
 
Dins aquel sens, la primièra dama de Benin, Claudine Gbènagnon, diguèt que los autors d’aquela practica an trobat lo biais d’escapar a la lei. “Lo fenomèn es vengut clandestin”, çò precisèt dins un comunicat legit per son assistent Pounami Doko Toko, que sostenguèt que, e mai s’abans se realizava publicament, ara s’efectua a la dessaupuda de las autoritats. En Benin, las filhas començan d’èsser somesas a la mutilacion genitala fòrça pichonas, en fòrça cases quitament abans d’aver començat a parlar, del temps qu'abans la mutilacion genitala femenina se fasiá a l’edat d’onze ans, segon Gbènagnon. En mai d’aquò, la primièra dama de Benin indiquèt que las familhas escapavan a la lei en anant en Burkina Faso e Nigèr per sometre lors filhas al procediment.
 
Gbènagnon afirmèt tanben que las chifras realas de las filhas e las femnas victimas de la mutilacion genitala èran dos o tres còps superioras a las estatisticas de l’ÒNU.
 
Per quant a ela,  la primièra dama de Burkina Faso, Sika Kaboré, defendèt que caliá melhorar l’educacion, l’alfabetizacion e l'independéncia de las filhas per luchar contra la mutilacion genitala. “Òm a fach de grandas avançadas, mas i a encara un long camin de far”, çò assolidèt  dins son discors.