Lo caumatge dins la zòna de l’èuro davalèt en decembre a sos nivèls pus basses dempuèi 2009, segon de donadas que publiquèt l’Eurostat dimars passat. Segon lo burèu de l’estatistica europèu Eurostat, los païses de l’èuro aguèron un taus de caumatge del 9,6%, una decimala de mens qu'en novembre, e gaireben un ponch en dejós a respècte del meteis periòde de l’an precedent, quand èra de 10,5%.
 
Per quant a l'ensems de l'Union Europèa, lo caumatge en decembre foguèt pus bas que dins los estats amb la moneda unica, del 8,2%, un nivèl que s’atenhiá pas, en aquel cas, dempuèi febrièr de 2009. L’estat espanhòl contunha d'èsser lo segond estat de l'UE amb mai de caumaires, lo 18,4% en decembre, darrièr Grècia (lo 23%, segon de donadas d’octòbre). Ça que la, tant l’estat francés coma l’italian an mai de caumaires que los païses de l’UE fòra l’èuro. En decembre, lo taus de caumatge en França èra del 9,6% e lo d’Itàlia arribava al 12%.
 
Segon las donadas d’Eurostat, los estats de la zòna èuro amb mens de caumaires en decembre de 2016 èran Chequia (lo 3,5%) e Alemanha (lo 3,9%). En comparason amb las donadas de l’an precedent, lo caumatge descendèt en 24 estats de l’union e cresquèt en Chipre, Itàlia, Estònia e Danemarc.
 
 
Caumatge juvenil
 
Per rapòrt als joves de mens de 25 ans, las chifras publicadas pel burèu de l’estatistica europèu dison que patisson totjorn un caumatge plan naut, qu'arriba al 18,9% dins l'UE e al 20,9% dins l’Eurozòna. Espanha e Grècia, tornarmai, son los estats amb mai de joves sens nat emplec, lo 42,9% e lo 44,2%, respectivament, seguits d’Itàlia (40,1%). Per contra, lo caumatge juvenil mai bas es lo d’Alemanha (lo 6,5%).