L’aument dels afrontaments a Avdiivka, a l’èst d’Ucraïna, a provocat qu’aperaquí 17 000 personas, dont 2500 enfants, ajan pas d’accès a l’electricitat ni a l’aiga potabla, çò denoncièt dimècres passat lo Fons de l’ÒNU pels enfants (Unicèf), qu’avertiguèt del barrament de sièis escòlas de la region.
 
L’agéncia de l’ÒNU alèrta qu'un grand nombre de menors son victimas d’estransi e que las infrastructuras d’Avdiivka an patit de damatges importants pendent los darrièrs jorns.
 
“Lo conflicte met pas solament en perilh la vida dels milièrs d’enfants, mas la manca d’aiga e d’electricitat fa dels fogals d’endreches de mai en mai perilhoses a causa del fred”, çò soslinhèt la representanta de l’Unicèf en Ucraïna, Giovanna Barberis. “L’organizacion reclama un accès segur per efectuar sul pic los adobaments necessaris de las infrastructuras per tal de prevenir un aument de la sofrença d’aquelas familhas e enfants”, çò precisèt.
 
Las talhadas d’electricitat an provocat l'interrupcion del porgiment d’aiga d’una de las sèrvas màgers de la vila, necessària pels sistèmas de calfatge. La davalada de las temperaturas, a l’entorn de mens 17 grases, poiriá aver de consequéncias catastroficas pels residents de la vila.