CAPÇALERA PAIS INVISIBLE

Actualitats

SocietatPoliticaInternacional

Catalonha: comença lo jutjament contra Artur Mas e dos autres èx-membres del govèrn catalan per avèr organizat un vòte

Al total seràn cinc jornadas que resumiràn una enquèsta de dos ans. Acusan los tres politicians de desobesissença grèva, prevaricacion, malversacion de fonzes publics e usurpacion de foncions

Se ten uèi a Barcelona lo jutjament contra l’èx-president de la Generalitat de Catalonha Artur Mas, l’èx-vicepresidenta Joana Ortega e l’èx-conselhièra de l’ensenhament Irene Rigau. Son davant los tribunals per aver organizat lo procès participatiu del 9 de novembre de 2014: son acusats de desobesissença grèva, prevaricacion, malversacion de fonzes publics e usurpacion de foncions. Aquel eveniment participatiu pel qual son jutjats foguèt una mobilizacion istorica en Catalonha e en Aran, que consistiguèt en una consultacion sus l’independéncia del país, e mai s’èra enebida per l’estat espanhòl. La consultacion se tenguèt dins d’escòlas publicas e foguèt organizada per l’executiu amb l’adjuda de benevòls e de las associacions independentistas.
 
 
Cossí se debanarà lo jutjament?
 
Lo tribunal definiguèt fa sièis jorns lo calendièr de las sesilhas. Al total seràn cinc jornadas que resumiràn una enquèsta de dos ans, las declaracions de 35 testimònis e las dels acusats, que lo tribunal entendèt ja en octòbre passat.
 
Uèi son Artur Mas, Joana Ortega e Irene Rigau que faràn una deposicion. Entre dimars e dijòus vendrà als testimònis. E es previst que lo procès s’acabe divendres amb los plaidejaments de l’acusacion e de la defensa.
 
Los elegits jutjats riscan de penas d’enebicion d’exercir.
 
 
Rassemblament de protèsta
 
Aquel fach insolit a mobilizat las associacions catalanistas qu’an convocat un grand rassemblament de protèsta davant la cort de justícia. E mai s’es diluns, e doncas un jorn obrant, aperaquí 50 000 personas an anonciat lor participacion sul sit web de la protèsta. 170 autobusses son venguts de pertot. (Imatges)
 
 
Declaracion de Puigdemont
 
Après una declaracion del president Carles Puigdemont a 8h00, los tres jutjats sortisson del palais de la Generalitat acompanhats d’una molonada de deputats, cònsols e d’autres elegits dont lo quite Puigdemont. Es previst qu’arriben a 8h45 a la cort de justícia.
 
 
342 jornalistas
 
Un total de 342 jornalistas de 70 mèdias se son acreditats per raportar lo jutjament sus plaça.
 
 

En dirècte

— Le Monde
— VilaWeb
 

abonar los amics de Jornalet

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Francesc Palma
1.

Ben , que l'independencia sia una causa trop importanta per que l'estat espanyol l'accepti, ho compreni. Que la reconeissença de la nacion catalana sia trop demandar per l'estat espanyol ? Non, la Constitucion reconeis que hi ha nacionalitats. Mas es lo pp que non vol pas reconeisser ni la nacion catalana ni res de res. Solament Castilla cierra Espanha.

  • 6
  • 0

Escriu un comentari sus aqueste article