Era 38u edicion dera Marcha Beret, celebrada aguesta dimenjada passada en Aran, a artenhut era chifra recòrd de 900 participants. Era prestigiosa corsa d’esquí de hons d’estil classic, que combine ara perfeccion eth naut nivèu esportiu damb es amators, non a quitat d’èster era competicion d’esquí de hons mès prestigiosa d’Occitània.
 
Er eveniment compdèc coma tostemp damb es familhes e es grops d’amics que participen de manèra populara. Era Marcha Beret tanben atrè a participants d’elèit, vengudi enguan de païsi coma Finlàndia, Norvègia, Estònia, Russia, Itàlia e França. Cau soslinhar qu’era corsa ei en laguens deth calendèr Euroloppet de marches populares.
 
Era corsa que prepause 3 distàncies —10, 21 e 42 quilomètres— que passen peth Plan de Beret a 1850 mètres de nautada.
 
Era corsa qu’ei promoiguda peth Conselh Generau d’Aran e pera estacion d’esquí de Vaquèira nomentada Baqueira-Beret. Que compde, ath delà, damb era collaboracion dera comuna deth Naut Aran, dera Associacion des Volentaris dera Val d’Aran e d’auti organismes e entitats mès dera Reiau Federacion Espanhòla des Espòrts d’Iuèrn e dera Federacion Catalana des Espòrts d’Iuèrn.
 
 
 
 
FM