Lo govèrn escocés a respondut amb fòrça determinacion las declaracions del ministre de la defensa britanic, que diguèt qu’acceptariá pas un segond referendum d’independéncia en Escòcia après lo Brexit.
 
La primièra ministra escocesa, Nicola Sturgeon, declarèt dijòus passat qu’aquò seriá “una ofensa democratica” e “l’error pus grèva”. En mai d’aquò, avertiguèt qu’una posicion coma aquesta fariá pas que créisser lo nombre de partisans de l’independéncia. De son costat, lo deputat independentista Pete Wishart diguèt a Westminster que la situacion èra comica, perque lo Partit Conservator a solament un deputat suls 59 depuats escoceses d’aquela cambra, del temps que los independentistas n’an 56: “Un partit amb una representacion tant escarsa en Escòcia, cossí pòt pensar que pòsca decidir pels escoceses?”
 
La polemica comencèt quand lo ministre de la defensa britanic, Sir Michael Fallon, qu’èra anat en Escòcia per i presentar lo plan pel Brexit, respondèt a las questions dels jornalistas en assegurant que lo Reialme Unit abandonariá l’Union Europèa e qu’Escòcia tanben, perque li permetrián pas de far cap de referendum sus l’independéncia.
 
Dins lo referendum sul Brexit, los vòtes en favor de contunhar de far partida de l’Union Europèa foguèron fòrça majoritaris en Escòcia, Irlanda e Gibartar; per contra, en Anglatèrra e Galas ganhèron los partisans de se n’anar. Lo govèrn escocés reagiguèt en reclamant un segond referendum d’independéncia per qu’Escòcia demorèsse dins l’Union Europèa.