Almens 119 personas mòrtas es lo tragic bilanç de las darrièras tempèstas de nèu, e sas consecutivas avalancas, que ven de patir Afganistan, çò a raportat la cadena privada de television Tolo. En mai d’aquò, las autoritats an confirmat que i a mai d’80 personas nafradas.
 
Lo Ministèri dels Trabalhs publics a raportat que las autoritats an tornat dobrir a la circulacion las principalas estradas, e mai se los menaires que dirigisson devèrs lo pas de Salang devon cambiar lors pneumatics per evitar d’accidents. Lo ministre a fach una crida a totes los ciutadans per que prengan las precaucions necessàrias davant las bassas temperaturas.
 
De son costat, lo ministre de la santat a indicat que la majoritat dels nafrats per las avalancas e las intensas nevadas son plan tractats dins los espitals del temps qu’a mandat una còla de mètges en Badakhshan per sonhar las victimas.
 
Diluns passat, i aviá 22 províncias afectadas per las nevadas e las avalancas, segon lo quite primièr ministre, Abdullah Abdullah, qu’a mandat d’ajuda d’urgéncia per ajudar los afectats. Dins aquel sens, Abdullah a afirmat que l’Autoritat Nacionala de Gestion dels Desastres consagra totes sos esfòrces per afrontar los problèmas que los patisson los afgans a causa del temporal e a demandat als ciutadans que collaboren per manténer las estradas sens nèu.
 
L’Ofici de l’ÒNU per la Coordinacion d’Afars Umanitaris a Kabol a plangut lo dòl de las familhas de las victimas mortalas e a promés que las Nacions Unidas donaràn tot lo sosten que caldrà al govèrn afgan per las operacions de socors.
 
Las províncias de Nuristan e Badakhshan son las pus afectadas.