Un professor dels Estats Units a agut una idèa per èsser mai près de sos escolans e lor bailar lo sentiment d’èsser especials. Los aculhís a la pòrta de la sala de classa e los saluda un per un d’un biais personalizat. Lo vidèo de la saludacion es vengut un fenomèn viral dins los rets socials.

Se nomena Barry White Jr. e es ensenhaire d’anglés de quatrena a l’Ashley Park Pre K-8 School, en Carolina del Nòrd. Abans cada cors, sos escolans son a tièra davant la pòrta de la sala, e los saluda un per un, amb una saludacion particulara per cada escolan, segon la personalitat de cadun.
 
“Soi totjorn esmogut quand començam de far los gèstes. Aquò lor agrada fòrça e los prepara per un cors de fòrça energia”, çò expliquèt l’ensenhaire a Good Morning America.
 
White s’inspirèt de son basquetaire favorit, LeBron James, que saludava sos collègas en tocant las mans d’un biais diferent per cadun. Aquò creava un ligam, e volguèt portar aquel sentiment a son cors.
 
“Comencèri l’an passat amb una simpla saludacion amb un escolana de quatrena. Ela m'esperava cada matin abans d'anar en classa”. Pauc a cha pauc, aquel gèst s'espandiguèt demest los autres escolans. Ara lo personal de l’escòla se sap grat de l’entosiasme que l’accion de White transmet a sos escolans. “Lo sol biais d’ajudar nòstres gojats a aténher un naut nivèl es de bastir de ligams significatius e prigonds. Las saludacions de Barry representan son biais autentic d’ajudar a la creacion d’aqueles ligams. Quand los enfants sabon que son professor se preocupa, son atentius, engatjats e motivats per reüssir”, çò declarèt Meaghan Loftus, directritz del collègi.