Se ditz que l’òme es lo pus grand predator de la Tèrra, e sembla qu’es atal tanben dins l’ocean. A l’ora d’ara, los sacs de plastic son una de las causas màgers de mòrt d’un fum d’espècias marinas.
 
Es lo cas d’una balena de Cuvier, que li deguèron practicar una eutanasia après que se foguèt encalada sus l’illa de Sotra, sus la còsta de Norvègia, çò rapòrta Norway Today. L’exemplar apareguèt dins un estat avançat de malnutricion. Malgrat los ensages de tornar botar l’animal dins la mar, coma o volguèron far las abitants de l’endrech e los scientifics de l’Universitat de Bergen, l’estat de santat de la balena èra talament grèu que decidiguèron de li administrar l’eutanasia.
 
Puèi, menèron lo còrs de la bèstia al laboratòri per descobrir la causa de son grèu estat de malnutricion e descobriguèron dins son estomac 30 sacs de plastic. L’acomolacion de tant d’escobilhas dins son ventre empediguèt que la balena poguèsse digerir, e es aital, dins un estat de feblesa extrèma, que l’aiga la menèt fins a l’illa ont moriguèt.
 
“L'estomac de la balena èra tot plen de sacs e de paquets qu'èran en anglés e en danés”, çò diguèt als mèdias norvegians lo zoològ Terje Lislevand.
 
Segon las estimacions dels scientifics, a l’ora d’ara, i auriá 5 bilions de sacs de plastic dins los oceans, e se prevei qu’en 2050 i aurà mai de sacs que de peisses.