La banlèga de París viu totjorn de nuèches de protèstas, susmautas e rambalhs après que la polícia aguèt arrestat la setmana passada un jove d’un biais fòrça violent a Aulnay-sous-Bois. Un agent es mes en examen per viòl e tres autres per violéncia volontària.
 
Las protèstas comencèron dissabte e son de mai en mai violentas amb d’incendis de veïculs e de botigas, e d’afrontaments amb la polícia que tenon de bilances de ferits e de detenguts considerables a cada jornada. Recòrdan la violéncia que la visquèt la banlèga de la capitala francesa a la davalada de 2005, quand lo ministre de l’Interior d’alara, Nicolas Sarkozy, diguèt amb mesprètz que netejariá la banlèga “amb Kärcher”. Pasmens, de l'espital estant, la presumida victima apèla a la patz, persuadida que "justícia sera facha".
 
 
Violat amb una matraca extensibla
 
La detencion qu'a provocat las protèstas se tenguèt lo 2 de febrièr passat. Lo detengut, Théo, es un jove negre de 22 ans que, segon son relat, los agents lo batèron mentre qu’un d’eles li metiá una matraca extensibla dins l’anus. Lo jove deguèt èsser operat a causa d’esquiçaduras.
 
Lo ministèri de l'Interior francés, Bruno Le Roux, anoncièt lo dimenge la suspension d'aqueles quatre foncionaris. Lo ministèri public raportèt que los agents volián contrarotlar l’identitat d’un desenat de personas suspèctas de susvelhar de ponches de venda d’estupefasents en aquela vila de la banlèga parisenca. Segon aquela version, los agents, que recebèron lo sosten de Marine Le Pen, se serián servits de gas lacrimogèn e d’una matraca extensibla pr’amor que lo jove resistissiá.
 
 
Hollande soslinha lo ròtle de la justícia
 
Lo president de la Republica Francesa, François Hollande, soslinhèt dimars passat lo ròtle de la justícia, mentre que vesitava la cort de Pontoise, al nòrd de París. “Es la garentida de las libertats dels ciutadans, quitament quand los agents de las fòrças de l’òrdre se veson meses en question”.